Бүгін ҚР Премьер-Министрінің орынбасары Г. Әбдіқалықова бастаған Үкіметтік делегацияның жұмыс сапары Алматы облысында жалғасты.

Күннің алғашқы шарасы ретінде «Инфраэнерго» ЖШС базасында қала, аудан әкімдерімен, өнеркәсіп кәсіпорындарының, бизнес-құрылымдар мен кәсіподақ ұйымдарының басшыларымен кеңес өткізілді. Бұл зауыт облыстағы ірі кәсіпорындардың бірі және жарылыстан қорғалған электрлік-техникалық жабдықты, аппаратураны, бақылау жүйесін, апатқа қарсы қорғаныс және сигнализацияны дайындаумен, монтаждаумен және жөндеумен айналысады.

Кеңеске қатысушылар жалақысы төмен қызметкерлердің еңбек ақысын арттыру, жаңа жұмыс орындарын құру, бизнестің әлеуметтік жауапкершілігін күшейту, аз қамтылған қызметкерлерге әлеуметтік көмек көрсету мәселелерін қарастырды. Облыста 11317 ұжымдық шарт жасалды, ірі және орта кәсіпорындардың 74,1%-і қамтылды. 118,5 мың адамды қамти отырып, жұмыс орындарын сақтап қалу бойынша 9,7 мың меморандум жасалды. Бұл ретте осы жылдың басынан бері өңірде жұмыскерлерді жұмыстан босату болмағанын айта кету керек. Сонымен қатар

43 кәсіпорында 704 көп балалы қызметкер жұмыс істейді, оның ішінде 524 адамның тұрғын үйі жоқ. Мысалы, «PSI STROI UNDYSTRYA» ЖШС-да 95 көп балалы қызметкердің 75-і пәтерге мұқтаж.

Облыста әлеуметтік жауапкершілік танытудың айқын мысалы ретінде Жамбыл ауданынан «Ақтерек» шаруа қожалығының басшысы Темірлан Шайнүсіповті келтіруге болады. Ол ауылдастарын жұмыспен қамтамасыз етіп қана қоймай, әлеуметтік салаға да тұрақты жәрдем беруде. 50 орындық «Дәрия-2016» балабақшасын, заманауи футбол алаңын, сондай-ақ «Болашақ» әмбебап сауда орталығын салды. Ең бастысы, ол 2008 жылдан бастап көп балалы және аз қамтылған отбасыларға, сондай-ақ өз шаруашылығының жұмысшылары үшін 105 үй тұрғызды. Табысты кәсіпкер өз әріптестерін көп балалы отбасыларға, аз қамтылған азаматтарға, сондай-ақ мүмкіндіктері шектеулі жандарға жан-жақты көмек көрсетуге үндеді.

Шара соңында Гүлшара Әбдіқалықова кәсіпорындар және бизнес-құрылымдар басшыларын Темірлан Шайнүсіповтің ізгілігіне қолдау көрсетіп, халықтың әлеуметтік қорғалмаған топтарына жүйелі әрі жан-жақты көмек көрсетуге шақырды.

Бұдан әрі Г. Әбдіқалықова 2017 жылы мамырда ашылған Көп салалы облыстық балалар ауруханасының неонатальды орталығына барды. Орталық жаңа құралдармен жабдықталған және балалар мен жаңа туған нәрестелерге мамандандырылған және жоғары сапалы хирургиялық, травматологиялық көмек көрсетеді. Оның жұмысы өңірдегі нәрестелер өлімінің деңгейін төмендету мақсатында патологияны ерте кезеңде анықтауға және алдын алуға бағытталған. Орталық ашылғаннан бері 398 науқас емделген, оның ішінде 25-і — жаңа туған нәрестелер. Бұл ретте 189 ота жүргізілген, оның ішінде 18 сәбиге ота жасалған. Бұған дейін Талдықорған қаласында жаңа туған нәрестелерге ота жасалмайтын.

Жұмыс сапарының соңында ҚР Премьер-Министрінің орынбасары «Қаратал» шағын ауданындағы студенттерге арналған жатақхана құрылысының барысымен танысты. Құрылысы аяқталмаған қонақ үй ғимаратын қайта жаңғыртудың арқасында қалада 288 орындық заманауи студенттер жатақханасы тұрғызылып, оның маңындағы аумақ абаттандырылады. Жобаның жалпы құны 2,4 млрд теңгені құрайды.

Осымен Үкіметтік делегация Алматы облысындағы жұмысын аяқтап, Қарағанды облысының Жезқазған қаласына бет алды.

www.primeminister.kz

Бүгін ҚР Премьер-Министрінің орынбасары Г. Әбдіқалықова бастаған Елбасының «Әлеуметтік қамқорлық» жаңа әлеуметтік шараларының негізгі бағыттарын түсіндіру жөніндегі үкіметтік жұмыс тобы Алматы облысына барды.

Жұмыс тобының құрамына ҚР еңбек және халықты әлеуметтік қорғау министрі Б. Сапарбаев, ҚР білім және ғылым министрі К. Шәмшидинова, ҚР денсаулық сақтау министрі Е. Біртанов, Құрылыс және тұрғын үй-коммуналдық шаруашылық істері комитетінің төрағасы М. Жайымбетов кірді.

ҚР Премьер-Министрінің орынбасары Г. Әбдіқалықова мен ҚР еңбек және халықты әлеуметтік қорғау министрі Б. Сапарбаев жұмыс сапарын Талдықорған қаласының қалалық жұмыспен қамту орталығы мен халыққа қызмет көрсету орталығынан бастады, онда мекемелердің жұмыстарын тексерді.

2018 жылы облыста 8294 адам жұмысқа орналастырылды, оның ішінде 2681 адам тұрақты жұмыс орындарына тұрды, 3248 адам төленетін қоғамдық жұмыстарға жіберілді. Жұмыспен қамту орталығында атаулы әлеуметтік көмек тағайындау тәртібі егжей-тегжейлі қаралды, бірқатар нақты тапсырмалар берілді. Талдықорған қаласының ХҚКО-да 2018 жылы 234 мыңнан астам құжат берілді, олардың 59% электронды түрде ұсынылған.

Бұдан кейін жұмыс тобы Алматы облысының тұрғындарымен кездесті. Жиынға көп балалы аналар, аз қамтылған отбасылар, еңбек ардагерлері, мүмкіндіктері шектеулі жандар, мұғалімдер, дәрігерлер, азаматтық қоғам өкілдері қатысты.

Гүлшара Әбдіқалықова өз сөзінде жаңа әлеуметтік саясаттың негізгі бағыттары, жұмыс тобының мақсаттары мен міндеттері туралы толығырақ айтып берді. Халықтың әл-ауқатын жақсарту мақсатында қолға алынған шаралар туралы егжей-тегжейлі баяндай отырып, ол мемлекеттің басымдығы халықтың тұрмыс деңгейін барынша жақсарту екенін атап өтті. Басты міндет — халықты жұмыспен қамтамасыз ету, халықтың әлеуметтік қорғалмаған топтарына міндетті түрде мемлекет тарапынан қолдау көрсетіледі.

Залда көтерілген сұрақтарға жұмыс тобының мүшелері нақты әрі толық түсініктеме берді.

Кездесу аяқталғаннан кейін Вице-премьер цифрлық сауаттылықты дамытуға бағытталған №28 АТ-лицей мектебіне барды. Мұнда 1,3 мыңнан астам оқушы білім алып жатыр. Мектеп заманауи жабдықтармен жабдықталған, 59 кабинет бар, оның ішінде информатика, психолог, лингафондық және мультимедиалық кабинеттер, оқу шеберханалары бар.

Бұдан кейін Г. Әбдіқалықова аз қамтылған отбасылармен кездесті. 5 бала тәрбиелеп, балабақшада тәрбиеші көмекшісі болып жұмыс істейтін көп балалы ана Т. Бекбердинованың пәтерінде болған Премьер-Министрдің орынбарасы атаулы әлеуметтік көмектің жаңа тетігін түсіндірді, оған сәйкес бұл отбасы енді ай сайын 141 125 теңге алатын болады.

Бірінші жұмыс күнінің соңында Г. Әбдіқалықова азаматтарды жеке қабылдады. Атап айтқанда, С. Тұраштың табысы төмен отбасының өтініші қанағаттандырылды, ол өз үйінде тігін ісін ашқысы келеді және қаржыландыруға мұқтаж. Өңір басшылығына 505 мың теңге көлемінде өтеусіз грант беру мәселесін шешу тапсырылды.

Мал шаруашылығымен айналысуға шешім қабылдаған С. Күмісбек шағын несие беруді сұрады. Бұл мәселе де оң шешімін тапты — облыс басшылығы оған шағын несие бөледі.

Жұмыс тобының басқа мүшелері облыс аудандары бойынша сапарларда болды. ҚР денсаулық сақтау министрі Е. Біртанов Ескелді ауданында, ҚР білім және ғылым министрі К. Шәмшидинова Көксу ауданында, Құрылыс және тұрғын үй-коммуналдық шаруашылық істері комитетінің төрағасы М. Жайымбетов Талдықорған қаласының және Текелі қаласының құрылыс және ТКШ нысандары бойынша жұмыс сапарында болды.

Денсаулық сақтау, білім беру нысандарын, басқа да әлеуметтік мекемелерді, құрылыс алаңдарын аралай отырып, ауыл тұрғындары, мұғалімдер және дәрігерлермен әңгіме өрбіді. Халықтың жеке қабылдауы өтті, онда азаматтар өзекті сұрақтарға толық жауап алды, сонымен қатар олардың түйіткілді проблемаларын шешуге көмек көрсетілді.

Алматы облысына жұмыс сапары жалғасады.

www.primeminister.kz

Үкіметтің кезекті отырысында 2019 жылдың І тоқсанындағы ҚР әлеуметтік-экономикалық дамуының және республикалық бюджеттің орындалуының көрсеткіштері, сондай-ақ, шикізаттық емес экспортты ілгерілету және Ұлттық экспорттық стратегияны іске асыру барысы қаралды. Үкімет кулуарында БАҚ қызығушылық танытатын мәселелерді талқылау жалғастырылды.

Отырыстың күн тәртібінің алғашқы мәселесі бойынша ҚР ұлттық экономика министрі Р. Дәленов баяндады. Оның айтуынша, осы жылдың І тоқсанында экономиканың өсуі жалғасып, жекелеген өңдеу секторлары екі таңбалы өсуге шыққан, инвестициялар мен құрылыс айтарлықтай өскен.

Өз кезегінде Ұлттық банк төрағасы Е. Досаев 2019 жылғы наурызда айлық инфляция 0,5% болғанын айтты. Жылдық инфляция 4,8% деңгейінде сақталды, бұл 2019 жылға арналған 4-6% нысаналы дәліздің ортасына сәйкес келеді.

ҚР Премьер-Министрінің Бірінші орынбасары – қаржы министрі Ә. Смайылов 2019 жылғы І тоқсандағы мемлекеттік бюджетттің атқарылуы туралы айтып берді. Ағымдағы қаржы жылының І тоқсанында бюджеттің барлық деңгейлерінде кірістер жоспардан асыра орындалып, оң өсу қарқынын көрсетті.

«Самұрық-Қазына» ҰӘҚ» АҚ басқарма төрағасы А. Есімов өз сөзінде қор активтерін шетелде қорғау мәселесіне тоқталды. Ол ҚР-ға қарсы шығарылған халықаралық арбитраж процестері бойынша шешімдер тетігін әзірлеуді ұсынды.

Сонымен қатар, отырыста Ақмола облысының әкімі Е. Маржықпаевтың, Нұр-Сұлтан қаласының әкімі Б. Сұлтановтың баяндамалары тыңдалды.

Баяндамаларды тыңдағаннан кейін, ҚР Премьер-Министрі А. Мамин жыл қорытындысы бойынша оң көрсеткіштерді қамтамасыз ету үшін негізгі капиталға, құрылысқа және басқа да секторларға салынатын инвестицияларды одан әрі өсіру бойынша жұмысты күшейту керек екенін айтты. Сондай-ақ, орталық және жергілікті атқарушы органдар бюджет қаражатын уақытылы әрі толық игеру жөнінде шаралар қабылдауы тиіс.

А. Мамин әлемдік экономика өсімінің бәсеңдеуі және сарапшылардың оның қарқындарының 2018 жылы 3,6%-дан 2019 жылы 3,3%-ға дейін төмендеуі туралы болжамдары жағдайында экономиканың инклюзивті және сапалы дамуына көңіл бөлу қажеттігін айтты.

Белсенді дамушы елдердің сәтті тәжірибесі көрсеткендей, экономиканың орнықты дамуы негізгі капиталға инвестициялар көлемін үнемі сандық әрі сапалық арттыру есебінен қамтамасыз етілуі қажет екенін көрсетті.

«Инвестициялық саясатта таза тікелей шетелдік инвестицияларды тарту басымдық болуы тиіс», — деді А. Мамин.

Күн тәртібінің екінші мәселесін — шикізаттық емес экспортты ілгерлету мәселелері және Ұлттық экспорттық саясатты іске асыру барысын қарастыру ҚР ұлттық экономика министрі Р. Дәленовтың баяндамасынан басталды. Ол дамудың басты көрсеткіштерін сандармен көрсетті.

Өз кезегінде ҚР индустрия және инфрақұрылымдық даму министрі Р. Скляр 2018 жылдың қорытындысы бойынша Қазақстанның шикізаттық емес экспортында оң динамика байқалып отырғанын атап өтті.

«Химия өнеркәсібі 2,6%-ға, минералды өнімдер 14,6%-ға, машина жасау 11%-ға, азық-түлік өнімдері 7,6%-ға өсті», — деді Р. Скляр. Бүгінгі таңда Қазақстан 120 елге 800 тауар түрін шығарады.

Ауыл шаруашылығы министрі С. Омаров ауыл шаруашылығы өнімінің экспортын дамыту желісі бойынша баяндады. АӨК-ті дамытудың мемлекеттік бағдарламасында өңделген ауыл шаруашылығы өнімдерінің экспортын 2021 жылы $2,4 млрд дейін жеткізу жоспарланған.

«Бәйтерек» ҰБХ» АҚ төрағасы А. Әріпханов Елбасы тапсырмасы бойынша отандық кәсіпорындарды қаржылай және қаржылай емес қолдауды күшейту үшін алдағы 3 жылда 500 млрд теңге бағытталатынын, оның ішінде 470 млрд теңге «Бәйтерек» холдингінің құралдары арқылы бағытталатынын айтты.

Өз кезегінде, сыртқы істер министрі Б. Атамқұлов мемлекеттік органдармен міндеттерді ажырату бойынша ортақ түсіністік әзірленген, соған сәйкес ҚР СІМ-нің сыртқы деңгейдегі үйлестіруші ретіндегі рөлі бекітілгенін атап айтты. Салалық министрліктермен бірге нысаналау және мақсатты өнім түрлерін шетелдік нарықтарға ілгерілету мақсатында жұмыс жүргізіліп жатыр.

«Өнеркәсіптік бұйымдар мен ауыл шаруашылығы өнімдерінің экспортын ғана емес, құрылыс, логистика, туризм, ғарыш, қаржы, медицина және білім салаларындағы қызметтерді қамтитын тауарлық қатысуды бекіту және кеңейту мақсатында шекаралас елдермен сауданы кеңейтуге ерекше назар аударылады», — деді ҚР сыртқы істер министрі.

Мәселелерді талқылаудың қорытындысын шығара отырып, ҚР Премьер-Министрі А. Мамин ЕАЭО аясында серіктес елдермен, Қытаймен және басқа да мемлекеттермен сауда айналымын ұлғайтудың басты шарты отандық тауарлар мен көрсетілетін қызметтердің бәсекеге қабілеттілігін арттыру екенін атап өтті. Бұл үшін экспортты мемлекеттік қолдау шаралары қарастырылған, Қазақстандық индустрия және экспорт орталығы құрылды. Бизнесті мемлекеттік қолдаудың қаржылай құралдары өндірістен бастап экспортқа дейін бір жерде шоғырланады.

«Трансшекаралық инфрақұрылымның сапасы мен қолжетімділігін арттыру жұмыстарын күшейту қажет. Бұл аса маңызды, себебі біздің көршілес сауда серіктестеріміздің экономикаларының өсу болжамдары тұрақты», — деді ҚР Премьер-Министрі.

Отандық ауыл шаруашылығы өнімдерінің экспортын ілгерілетуге жекелей көңіл бөлінді.

«Біздің өнімдеріміз басқа елдерде танымал болуы тиіс, әрі ортақ экспорттық брендті құру арқылы экспортты дамыту қажет. Заманауи зертханалық базаны құру керек. Бұл бизнестің өз тауарлары мен көрсетілетін қызметтеріне тиісті сертификаттар алуына көмектеседі», — деді ҚР Үкіметінің басшысы.

ҚР Премьер-Министрі А. Мамин бір ай мерзімде барлық салалар бойынша экспортты дамыту және көрсетілетін қызметтердің басым секторлары бойынша жол карталарын әзірлеуді, сондай-ақ, халықаралық деңгейге сай келетін қазақстандық стандарттар, техникалық регламенттер мен нормаларды әзірлеп, енгізуді тапсырды.

Үкімет кулуарында журналистердің қызығушылық танытқан сұрақтарына ҚР Премьер-Министрінің Бірінші орынбасары – қаржы министрі Ә. Смайылов жауап берді. Осы жолы журналистер Үкімет қорынан 2019 жылдың маусым айында өтетін ҚР Президентінің кезектен тыс сайлауын өткізу үшін бөлінген қаражат туралы сұрақ қойды.

«Бүгін Үкімет отырысында Үкіметтің қорынан 9,4 млрд теңге бөлу туралы шешім қабылданды, аталған қаражат сайлау өткізуді қамтамасыз етуге бағытталатын болады. Бұл сома негізінен жалпы Қазақстан бойынша 70 мыңға жуық адам жұмыс істейтін, шамамен 10 мың сайлау учаскесінің жұмысын ұйымдастыруға бағытталады», — деді Ә. Смайылов.

Оның айтуынша, қаражаттың негізгі бөлігі сайлау учаскелерінде жұмыс істейтін адамдардың еңбек ақысына жұмсалады.

«Сомасы түзетілді. Әрбір өңір бойынша учаске санын, онда жұмыс істейтін адамдардың санын нақтыладық. Аталған учаскелерде барлық адамдар толық мерзім жұмыс істеуге алынбаған. Біз осы өзгешеліктердің барлығын ескеріп, 9,4 млрд теңге бөлу туралы шешім қабылдадық», — деді қаржы министрі.

ҚР индустрия және инфрақұрылымдық даму министрі Р. Скляр мобильдік қосымшалардың көмегімен адамдарды жеке тасымалдаумен айналысатын жүргізушілерге қойылатын жаңа талаптарды түсіндіріп берді.

«Бүгінгі таңда такси жолаушыларын тасымалдауға клиенттердің тапсырыстарын өңдейтін интернет-ресурстар кең таралған. Заң жобасында мобильді қосымшаларды ұдайы пайдаланатын заңсыз тасымалдаушыларды көлеңкеден шығаруға мүмкіндік беретін аталған онлайн-сервистердің қызметі реттелген. Тасымалдаушы қосымшаға тіркеліп, өзінің жеке деректерін қалдырып, жүргізуші куәлігінің, көлік құралының және сақтандыруының нөмірімен бөлісуі керек», — деді Р. Скляр.

Р. Склярдың айтуынша, жүргізушінің тұлғасы айқын болуы тиіс, себебі тіптен жүргізуші куәлігі жоқ азаматтардың тасымалдаумен айналысып жүрген жағдайлары анықталған.

ҚР әділет министрі М. Бекетаев Үкімет отырысында «Самұрық-Қазына» ҰӘҚ» АҚ басқарма төрағасы А. Есімов өз сөзінде атап өткен, Қазақстанға қарсы шығарылған халықаралық арбитраж процестері бойынша шешімдер тетігін әзірлеу туралы ұсынысқа түсініктеме беріп өтті.

«Мәселе мынада, шетелдік инвесторлар біз келіспейтін арбитраждық соттардың шешімі бойынша өтемақы өндіріп алуға тырысқан кезде уақыт жоғалады (кідіріс). Арбитраждық шешім шығады, біз апелляцияға береміз және осы сәтте біз төлем жасамайтын, алайда олар тезірек ақша алғысы келетін жағдай туындайды. Апелляциялық сатыға шағым түсірудің мәні де осыда. Осындай кезде инвесторлар "Самұрық-Қазына" активтеріне тыйым салуға тырысады, себебі олар "Самұрық-Қазына" толықтай ҚР Үкіметімен бақыланатынына, және, сәйкесінше, Қордың Үкімет міндеттемелері бойынша жауап беретініне сенеді. Біз мұнымен мүлдем келіспейміз. Бірлесіп жұмыс істеп, бұндай сенімдермен келіспейміз. Себебі, мысалы, акционер АҚ міндеттемелері бойынша ешқашан жауап бермейді, керісінде АҚ акционер міндеттемелері бойынша жауап бермеуі тиіс. Бұл екі бөлек заңды тұлға. Сондықтан да, осындай инвесторлардың іс-қимылдарына қарсымыз», — деп түсіндірді М. Бекетаев.

www.primeminister.kz

Бүгін ҚР Премьер-Министрі Асқар Маминнің төрағалығымен өткен Үкімет отырысында шикізаттық емес экспортты ілгерілету мәселелері және Ұлттық экспорттық стратегияны іске асыру барысы қаралды.

Ұлттық экономика министрі Р. Дәленов хабарлағандай, еліміздің ЖІӨ-дегі экспорттың үлесі 40,1% құрады. Бұл ретте ЖІӨ 0,5%-ға өсуі экспортпен қамтамасыз етіледі. Ұлттық экспорттық стратегия 2022 жылға қарай шикізаттық емес тауарлар экспортын және көрсетілетін қызметтер экспортын $32 млрд дейін өсіруді көздейді.

«2018 жылы қазақстандық тауарлардың және көрсетілетін қызметтердің экспорты $68,3 млрд құрап, 2017 жылмен салыстырғанда 24,2%-ға өсті. Өсім бірінші кезекте мұнай бағасының өсуімен байланысты. Оның ішінде шикізаттық емес тауарлар экспорты және көрсетілетін қызметтер экспорты $23 млрд құрады. 2017 жылмен салыстырғанда бұл көрсеткіш 4,1%-ға өсті. 2018 жылы көрсетілетін қызметтер экспорты оң серпінді көрсетті. Өсу 12,3% құрады. Көрсетілетін қызметтер экспорты $7,3 млрд құрады», — деді Р. Дәленов.

Қазақстандық өңделген тауарлардың негізгі тұтынушылары – Қытай, Ресей, Нидерланды, Өзбекстан, Ұлыбритания, Түркия, Жапония, Қырғызстан, Біріккен Араб Әмірлігі және Ауғанстан. Жалпы, аталған елдерге 2018 жылы қазақстандық өңделген тауарлар экспортының 75% тиесілі.

Ұлттық экономика министрінің айтуынша, шикізаттық емес экспортқа металлургия өнеркәсібі тауарлары зор үлесін салды. Бұл — құбырлар, металл конструкциялары, илемдер, қорытпалар, металдар және т.б. Көлемі бойынша келесісі — химия саласының тауарлары. Бұл топта экспорттың негізгі көлемі уранға тиесілі. Алғашқы үштікке мұнай өнімдері кіреді.

«Шикізаттық емес тауарлар мен көрсетілетін қызметтер экспортының көлемін 2022 жылға қарай $32 млрд дейін ұлғайту үшін мына тауарлардың экспортын: өнеркәсіп тауарларын $5,7 млрд-қа арттырып $20,2 млрд дейін, ауыл шаруашылығы тауарларын $0,7 млрд-қа арттырып $1,9 млрд дейін, көрсетілетін қызметтерді $2,4 млрд-қа арттырып $9,7 млрд дейін жеткізу қажет. Экспорттың айтарлықтай өсуі көлік қызметтерінің $4 млрд-тан $5,3 млрд дейін және туризмнің $2,4 млрд дейін өсуінен күтілуде», — деді Р. Дәленов.

Өз кезегінде индустрия және инфрақұрылымдық даму министрі Р. Скляр 2018 жылы Қазақстанның шикізаттық емес экспортында оң динамика байқалып отырғанын атап өтті.

«Химия өнеркәсібі 2,6%-ға, минералды өнімдер 14,6%-ға, машина жасау 11%-ға, азық-түлік өнімдері 7,6%-ға өсті», — деді Р. Скляр.

Бүгінгі таңда Қазақстан 120 елге 800 тауар түрін шығарады. Өңдеу өнеркәсібінің негізгі экспорттық тауарлары – ферроқорытпалар, өңделмеген мырыш, тазартылған мыс, уран, мұнай газдары, трансформаторлар және аккумуляторлар.

2018 жылы дайын өнімнің экспорты 16%-ға артты. Сонымен бірге, өңделген өнімдер экспортында дайын өнімдер экспортының үлесі 2017 жылмен салыстырғанда 2,5 пайыздық тармаққа өсіп, 23%-ды құрады. Биыл да шикізаттық емес экспорт өсімі күтіліп отыр.

Ауыл шаруашылығы министрі С. Омаров АӨК-ті дамытудың мемлекеттік бағдарламасында өңделген ауыл шаруашылығы өнімдерінің экспортын 2021 жылы $2,4 млрд дейін жеткізу жоспарланғанын айтты. Бұл ретте биыл экспорт көлемі $1,27 млрд дейін жететін болады.

«Өткен жылдың қорытындысы бойынша $1,125 млрд сомасына 3,5 млн тонна өңделген ауыл шаруашылығы өнімі экспортталды. Бұл ретте, 275 өңделген ауыл шаруашылығы өнімінің тауарлық тобынан өткен жылы бірінші рет өңделген өнімдердің 17 жаңа түрі экспортталды», — деді С. Омаров.

Өңделген өнімдер экспортының географиясы да едәуір кеңеюде. Егер Қазақстан 2017 жылы өңделген өнімді 42 елге экспорттаса, 2018 жылы әлемнің 48 еліне экспорттады. Жаңа импорттаушы елдер тізіміне Швейцария, Жапония, Бахрейн, Малайзия,Болгария, Гана, Ливан енді.

Сонымен қатар өңделген АӨК өнімдерін дәстүрлі нарықтарға экспорттау көлемінің өскені байқалады, атап айтқанда Өзбекстанға экспорт – 32,4%-ға, Ресейге – 7%-ға, Қырғызстанға – 11%-ға, Тәжікстанға – 9,7%-ға, Молдоваға экспорт 40,1%-ға артқан, сондай-ақ, жаңа нарықтар саналатын Қытайға экспорт 57,5%-ға, Нидерландыға экспорт 130%-ға өскен. Осы нарықтарға шығарылатын өңделген өнім экспортының болжамды өсімін ескерсек, тамақ өнімдерінің өндіріс көлемі 106,2%-ға дейін ұлғаяды.

«Бәйтерек» ҰБХ» АҚ төрағасы А. Әріпханов Елбасы тапсырмасы бойынша отандық кәсіпорындарды қаржылай және қаржылай емес қолдауды күшейту үшін алдағы 3 жылда 500 млрд теңге бағытталатынын, оның ішінде 470 млрд теңге «Бәйтерек» холдингінің құралдары арқылы бағытталатынын айтты. Оның ішінде 220 млрд теңге — бұл бұрын бөлінген қайтарылған қаражаттың қайта бөлінуі, одан 2019 жылы ҚДБ мен Даму экспортқа бағдарланған жобаларды қаржыландыруға 138 млрд теңге, 2020–2021 жж. — жыл сайын 41 млрд теңгеден бағыттайтын болады.

Өз кезегінде, сыртқы істер министрі Б. Атамқұлов мемлекеттік органдармен міндеттерді ажырату бойынша ортақ түсіністік әзірленген, соған сәйкес ҚР СІМ-нің сыртқы деңгейдегі үйлестіруші ретіндегі рөлі бекітілгенін атап айтты.

«Министрлік салалық министрліктермен бірге нысаналау және мақсатты өнім түрлерін шетелдік нарықтарға ілгерілету мақсатында жұмыс жүргізуде. Өнеркәсіптік бұйымдар мен ауыл шаруашылығы өнімдерінің экспортын ғана емес, құрылыс, логистика, туризм, ғарыш, қаржы, медицина және білім салаларындағы қызметтерді қамтитын тауарлық қатысуды бекіту және кеңейту мақсатында шекаралас елдермен сауданы кеңейтуге ерекше назар аударылады», — деді сыртқы істер министрі.

Б. Атамқұловтың айтуынша, экспорттық өнімді ілгерілету үшін фронт-кеңселерге айналған Министрліктің орталық аппараты мен ҚР-ның шет елдердегі мекемелерінің жұмысы қайта форматталған.

ҚР Премьер-Министрінің орынбасары Ж. Қасымбек шикізаттық емес экспорт көлемін дамыту және арттыру Үкімет жұмысының негізгі бағыттарының бірі екенін атап айтты. Өткен жылы Қазақстан $23 млрд сомасына шикізаттық емес тауарлар мен қызметтерді экспорттады. Стратегияға сәйкес 2022 ж. қарай шикізаттық емес тауарлар мен қызметтер экспортын $32 млрд дейін жеткізу міндеті тұр. Жыл сайын шикізаттық емес тауарлар мен қызметтер экспорты $2,2 млрд-қа артуы тиіс. Бүгінде барлық құралдар бар, бюджетте алдағы 3-4 жылға қаржыландыру қарастырылған. Бір ай ішінде Жол карталары әзірленеді. Оларда мемлекеттік органдардың нақты шаралары, оларды іске асыру мерзімдері, жауапты орындаушылар бекітілетін болады.

www.primeminister.kz

ҚР Премьер-Министрі А. Маминнің төрағалығымен өткен Үкімет отырысында шикізаттық емес экспортты ілгерлету мәселелері және ұлттық экспорттық саясатты іске асыру барысы қаралды. Экспорттық әлеуетті одан әрі дамыту үшін Қазақстандық индустрия және экспорт орталығы құрылды.

Атқарылып жатқан жұмыстар туралы ұлттық экономика министрі Р. Дәленов, индустрия және инфрақұрылымдық даму министрі Р. Скляр, ауыл шаруашылығы министрі С. Омаров, сондай-ақ «Бәйтерек» ҰБХ» АҚ басқарма төрағасы А. Әріпханов баяндады. Өз кезегінде сыртқы істер министрі Б. Атамқұлов сыртқы нарықтарда экспорттық өнімді ілгерілерту туралы ақпараттандырды.

«Еліміздің экспорттық әлеуетін дамыту – экономиканың сапалы өсімін қамтамасыз етудің стратегиялық маңызды факторы», — деді А. Мамин.

2018 жылдың қорытындысы бойынша шикізаттық емес экспорт көлемі $23 млрд құрады, соның ішінде шикізаттық емес тауарлар экспортының көлемі — $15,7 млрд және көрсетілетін қызметтер экспорты — $7,3 млрд.

Экспорттық стратегияға сәйкес, ҚР Үкіметінің алдында 2022 жылға қарай шикізаттық емес экспортты $32 млрд дейін жеткізу міндеті тұр.

ҚР Премьер-Министрі ЕАЭО аясында серіктес елдермен, Қытаймен және басқа да мемлекеттермен сауда айналымын ұлғайтудың басты шарты отандық тауарлар мен көрсетілетін қызметтердің бәсекеге қабілеттілігін арттыру екенін атап өтті. Бұл үшін экспортты мемлекеттік қолдау шаралары қарастырылған, Қазақстандық индустрия және экспорт орталығы құрылды. Бизнесті мемлекеттік қолдаудың қаржылай құралдары өндірістен бастап экспортқа дейін бір жерде шоғырланады.

«Трансшекаралық инфрақұрылымның сапасы мен қолжетімділігін арттыру жұмыстарын күшейту қажет. Бұл аса маңызды, себебі біздің көршілес сауда серіктестеріміздің экономикаларының өсу болжамдары тұрақты», — деді ҚР Премьер-Министрі.

Отандық ауыл шаруашылығы экспортын ілгерілетуге жекелей көңіл бөлінді.

«Біздің өнімдеріміз басқа елдерде танымал болуы тиіс, әрі ортақ экспорттық брендті құру арқылы экспортты дамыту қажет», — деп ҚР Үкіметінің басшысы, оларды сыртқы нарықтарға қарқынды түрде шығару қажет екеніне назар аударды.

Бұл үшін қазақстандық өндірушілер өндіретін тауарлардың сапасын жоғарылатып, экспортқа шығарылатын елдердің талаптарына және регламенттеріне толық сәйкестігін қамтамасыз етуі қажет.

«Заманауи зертханалық базаны құру керек. Бұл бизнестің өз тауарлары мен көрсетілетін қызметтеріне тиісті сертификаттар алуына көмектеседі», — деп ҚР Үкіметінің басшысы, экспортқа бағдарланған тауарларды халықаралық электронды сауда алаңдары арқылы сату мәселесін пысықтау қажет екенін айтты.

ҚР Премьер-Министрі А. Мамин мәселені қарау қорытындысы бойынша бір ай мерзімде барлық салалар бойынша экспортты дамыту және көрсетілетін қызметтердің басым секторлары бойынша жол карталарын әзірлеуді, сондай-ақ, халықаралық деңгейге сай келетін қазақстандық стандарттар, техникалық регламенттер мен нормларды әзірлеп, енгізуді тапсырды.

www.primeminister.kz

ҚР Премьер-Министрі Асқар Маминнің төрағалығымен өткен Үкімет отырысында биылғы І тоқсандағы еліміздің әлеуметтік-экономикалық дамуының және республикалық бюджеттің орындалуының көрсеткіштері туралы ҚР Премьер-Министрінің Бірінші орынбасары – қаржы министрі Ә. Смайылов, ҚР ұлттық экономика министрі Р. Дәленов баяндады.

Күн тәртібінің мәселесі бойынша ҚР Ұлттық банкінің төрағасы Е. Досаев, «Самұрық-Қазына» ҰӘҚ» АҚ басқарма төрағасы А. Есімов сөз сөйледі, сондай-ақ Ақмола облысының әкімі Е. Маржықпаев пен Нұр-Сұлтан қаласының әкімі Б. Сұлтановтың баяндамалары тыңдалды.

ҚР Премьер-Министрі 2019 жылғы 10 сәуірде Елбасы Н. Ә. Назарбаевтың төрағалығымен өткен Қауіпсіздік кеңесінің отырысы туралы айтып өтті. Еліміздің биылғы І тоқсандағы әлеуметтік-экономикалық даму қорытындылары қаралды.

«Қаңтар-наурызда ЖІӨ 3,8%-ға өсті. Құрылыс, сауда, тау-кен өнеркәсібі, көлік саласы экономиканың басты өсу қозғаушылары болды», — деді А. Мамин.

2019 жылғы І тоқсандағы ҚР негізгі макроэкономикалық даму көрсеткіштері:

негізгі капиталға инвестициялар көлемінің өсімі — 7%;

биылғы 2 айда сыртқы сауда көлемі 7,5% өсті;

2019 жылдың 3 айында инфляция 1,3% құрады;

жұмыссыздық деңгейі — 4,8%.

Негізгі көрсеткіштер бойынша І тоқсанда Шығыс Қазақстан, Қостанай, Атырау, Павлодар және Қызылорда облыстары жақсы нәтижелерге жетті.

«Жыл қорытындысы бойынша оң көрсеткіштерді қамтамасыз ету үшін негізгі капиталға, құрылысқа және басқа да секторларға салынатын инвестицияларды одан әрі өсіру бойынша жұмысты күшейту керек, — деді ҚР Үкімет басшысы. — Сондай-ақ, орталық және жергілікті атқарушы органдар бюджет қаражатын уақытылы әрі толық игеру жөнінде шаралар қабылдауы керек.

ҚР Премьер-Министрі А. Мамин әлемдік экономика өсімінің бәсеңдеуі және халықаралық сарапшылардың оның қарқындарының 2018 жылы 3,6%-дан 2019 жылы 3,3%-ға дейін төмендеуі туралы болжамдары жағдайында экономиканың инклюзивті және сапалы дамуына көңіл бөлу қажеттігін айтты.

Белсенді дамушы елдердің сәтті тәжірибесі көрсеткендей, экономиканың орнықты дамуы негізгі капиталға инвестициялар көлемін үнемі сандық әрі сапалық арттыру есебінен қамтамасыз етілуі қажет екенін көрсетті.

«Инвестициялық саясатта таза тікелей шетелдік инвестицияларды тарту басымдық болуы тиіс», — деді А. Мамин.

Биыл 18 сәуірде шетелдік инвестицияларды тарту бойынша жаңа тәсілдерді ұйымдастыру туралы мемлекеттік органдардың басшылары және жергілікті атқарушы орган өкілдерінің қатысуымен кеңес өтеді.

«Барлық қабылданған мемлекеттік бағдарламалар барынша тиімді әрі толық көлемде іске асырылуы тиіс», — деді ҚР Премьер-Министрі А. Мамин. Орталық және жергілікті мемлекеттік органдар экономика өсімі қарқынын күшейтуге барлық күш-жігерді жұмсауы қажет.

www.primeminister.kz

Бүгін ҚР Премьер-Министрі А. Маминнің төрағалығымен өткен Үкімет отырысында 2019 жылғы қаңтар–наурыздағы ҚР әлеуметтік-экономикалық дамуының және республикалық бюджеттің орындалуының көрсеткіштері қаралды.

Ұлттық экономика министрі Р. Дәленов осы жылдың І тоқсанында экономиканың өсуі жалғасып, жекелеген өңдеу секторлары екі таңбалы өсуге шыққанын, инвестициялар мен құрылыс айтарлықтай өскенін айтты.

«Қаңтар–наурызда жалпы ішкі өнімнің өсуі 3,8% дейін нығайды. Қаңтар–ақпанда ол 3,5% құраған. Өсудің үдеуі өңдеу өнеркәсібінің өсу жағына шығуымен, сондай-ақ құрылыс және инвестициялардағы өсудің үдеуімен қамтамасыз етілді», — деді Р. Дәленов.

Биылғы қаңтар–наурызда өнеркәсіп өндірісі 3,2% өсті. Өңдеу өнеркәсібінің көптеген салаларында екі таңбалы өсу байқалды. Бұл — жеңіл өнеркәсіп, сусындар және пластмасса бұйымдарын өндіру, құрылыс материалдарын шығару, сондай-ақ машина жасау, оның ішінде автокөлік жасау.

Құрылыс жұмыстарының көлемі 8,9% артты. Ауыл шаруашылығы тұрақты өсу қарқынын сақтап тұр — өндіріс көлемі 3,6% ұлғайды. Көрсетілетін қызметтер саласында өсудің орнықтылығы сақталуда. Есепті кезеңде ол 3,7% өсті. Көрсетілетін қызметтер сегментіндегі өсім көшбасшысы — сауда саласы. Оның өсімі 7,2% деңгейінде тіркелді. Көлік саласында өсім 4,4% құрады.

Сыртқы сауда айналымы жағымды үрдіс көрсетуді жалғастыруда. Биылғы қаңтар–ақпанда ол 7,5% ұлғайды және негізінен экспорттың 11,1% ұлғаюының есебінен болды.

Ұлттық экономика министрі баяндамасын аяқтай отырып, көптеген көрсеткіштер бойынша І тоқсан қорытындысы бойынша жақсару байқалатынын айтты.

«ІІ тоқсанда қол жеткізген қарқындарды сақтап, оны жалғастыру маңызды. Ол үшін мүмкіндіктер бар. Біріншіден, нақтыланған бюджетті қаржыландыру ашылуда. Бұл тұтынушылық және инвестициялық сұранысты күшейтеді. Екіншіден, құрылыс, инвестициялық жұмыстар, сондай-ақ АӨК саласындағы жұмыстар кезеңі ашылуда. Үшіншіден, ІІ тоқсанда дәстүрлі түрде шағын және орта бизнес жанданады», — деді Р. Дәленов.

Өз кезегінде Ұлттық банк төрағасы Е. Досаев 2019 жылғы наурызда айлық инфляция 0,5% болғанын айтты. Жылдық инфляция 4,8% деңгейінде сақталды, бұл 2019 жылға арналған 4-6% нысаналы дәліздің ортасына сәйкес келеді.

15 сәуірде Ұлттық банк базалық мөлшерлемені 9% деңгейінде төмендету туралы шешім қабылдады. Базалық мөлшерлеменің қазіргі деңгейі инфляция бойынша 2019 жылға арналған нысаналы бағдарға қол жеткізуге ықпал етеді.

Валюта нарығындағы ахуал тұрақты. Айырбастау бағамы іргелі факторлардың әсерімен қалыптасуда. Теңгенің айырбастау бағамы аздап ауытқыды және Ұлттық Банктің өктемдік жүргізуі қажет болмады.

ҚР Премьер-Министрінің Бірінші орынбасары – қаржы министрі Ә. Смайылов 2019 жылғы І тоқсандағы мемлекеттік бюджетттің атқарылуы туралы айтып берді. Ағымдағы қаржы жылының І тоқсанында бюджеттің барлық деңгейлерінде кірістер жоспардан асыра орындалып, оң өсу қарқынын көрсетті.

«Шығыстардың атқарылуы 2018 жылдың осындай кезеңімен салыстырғанда жақсарды. Есепті кезеңде мемлекеттік бюджетке 2,9 трлн теңге түсім жиналды. 3 трлн теңгеге шығыстар атқарылды. Мемлекттік бюджеттің тапшылығы 94 млрд теңгені құрады. Бұл жоспардан 162 млрд теңгеге аз. Қолма-қол ақшаның бақылау шотында 285 млрд теңге қаражат қалыптасты», — деді Ә. Смайылов.

Мемлекеттік бюджеттің кірістері есептілік кезеңнің жоспарына қарағанда 105,6%-ға, республикалық – 102,1%-ға, жергілікті бюджеттер – 116,6%-ға асыра орындалды. Республикалық бюджетке 1 567 млрд теңге кіріс түсті. Бұл жоспардан 33 млрд теңгеге, ал былтырғы жылдың осындай кезеңімен салыстырғанда 268 млрд теңгеге артық.

Ә. Смайылов, сондай-ақ, биылдан бастап шағын және орта бизнес субъектілері үшін салықтық рақымшылық жасау шараларының нәтижесінде 34 мыңнан астам салық төлеуші жалпы сомасы 7,6 млрд теңгеге негізгі борыштарын өтегенін айтты (1 сәуірдегі жағдай бойынша). Олар бойынша 1,7 млрд теңге сомасына өсімпұл және 0,2 млрд теңге айыппұл есептен шығаруға жатады.

Республикалық бюджет шығыстары туралы айтар болсақ, Ә. Смайыловтың сөзінше, олар 2,7 трлн теңгені құраған, «қаражаттың 47% әлеуметтік салаға бағытталған».

Республикалық бюджеттен өңірлерге 1 112 млрд теңге нысаналы трансферттер қарастырылған. І тоқсанда оларға 171 млрд теңге бөлінді. Оның 165 млрд теңгесі игерілді.

Сонымен қатар, отырыста «Самұрық-Қазына» ҰӘҚ» АҚ басқарма төрағасы А. Есімов сөз сөйлеп, Ақмола облысының әкімі Е. Маржықпаевтың, Нұр-Сұлтан қаласының әкімі Б. Сұлтановтың баяндамалары тыңдалды.

Қорытындылай келе, ҚР Премьер-Министрінің Бірінші орынбасары – қаржы министрі Ә. Смайылов І тоқсанда экономикалық өсім қарқыны тұрақты болғанын айтты. Дегенмен, кейбір салалар мен өңірлерде өсім үрдісі жоспарланған көрсеткіштерге жеткен жоқ. Ә. Смайылов барлық индикаторлар мемлекеттік органдар мен әкімдіктердің жоспарларында көрсетілгенін, сондай-ақ жобалық кеңсе арқылы қайта қаралғанын айтты. Ол барлық орталық және жергілікті атқарушы органдарды алға қойылған мақсаттарға қол жеткізу үшін жұмысты жандандыруға шақырды.

www.primeminister.kz

ҚР Премьер-Министрі Асқар Мамин «Астана» халықаралық қаржы орталығының алаңында Орталықты одан әрі дамыту мәселелері бойынша жұмыс кеңесін өткізді.

Кеңес барысында қаржы нарығын дамыту және еліміздің биржа нарығы инфрақұрылымы, қаржы орталығының жұмысы реттейтін заңнаманы жетілдіру мәселелері қаралды.

АХҚО басқарушысы Қ. Келімбетов қаржы орталығы жалпы қолданыстағы 42 актіні (еск. – ағылшындық құқық негізінде), сондай-ақ құқықтық базаның ашықтығы мен «жинақылығын» қамтамасыз ететін қаржы қызметтерін реттеу бойынша 27 актіні қабылданғанын хабарлады. Сонымен қатар, соттағы, сотқа дейінгі даулардың шешілу тиімділігі мен жылдамдығын арттыру мақсатында а.ж. ақпан айында АХҚО соты мен Халықаралық арбитраж орталығы eJustice сот төрелігі жүйесін ресми түрде іске қосты, бұл жүйе Нұр-Сұлтан қаласында нақты болмай-ақ әлемнің кез келген түкпірінен электронды форматта талапарыз беруге мүмкіндік тудырады. Бүгінгі таңда АХҚО-ында 150 қатысушы тіркелген, жыл соңына дейін бұл санды 250-ге жеткізу жоспарланған.

Талқылауға сонымен қатар Премьер-Министрдің Бірінші Орынбасары – қаржы министрі Ә. Смайылов, әділет министрі М. Бекетаев, сыртқы істер министрінің бірінші орынбасары М. Тілеуберді, ұлттық экономика министрінің бірінші орынбасары А. Жұмабеков, ҚР индустрия және инфрақұрылымдық даму вице-министрі Б. Қамалиев, сонымен қатар Ұлттық банк төрағасының орынбасары Е. Біртанов қатысты.

Кеңес қорытындысы бойынша ҚР Премьер-Министрі Асқар Мамин аймақтық қаржы орталығына айналуы тиіс АХҚО-ны одан әрі дамыту бойынша нақты тапсырмалар берді.

«Біздің басымдығымыз – АХҚО-ны дамыту. Мемлекет оның дамуы және табысты жұмыс істеуі үшін барлық жағдайларды жасап жатыр», – деді А. Мамин.

Кеңесте шетелдік инвестициялардың ағымын арттыру, жаңа халықаралық әуе бағыттарын ашу, қаржы саласындағы заңнамаға өзгерістер енгізу мәселелері қаралды.

www.primeminister.kz

Бұл туралы бүгін ҚР Үкіметінің баспасөз орталығында өткен баспасөз конференциясында ҚР білім және ғылым министрі Күләш Шәмшидинова айтып берді.

Білім және ғылым министрі білім беру жүйесінің маңызды мәселелерінің бірі инфрақұрылымды дамыту екенін атап өтті.

«Алдағы 3 жылда 190 мектеп салынатын болады. Ең басты міндет – үш ауысымдық мектептер мен апатты ғимараттарда орналасқан мектептер проблемасын, оқушылар орнының тапшылығын шешу», — деді министр.

К. Шәмшидинова сонымен қатар өзгеріп жатқан еңбек нарығының жаңа талаптарын ескерумен білім беру жүйесінің дамуы туралы айтып берді. Химия, биология, информатика және физика пәндері бойынша жұмыс істейтін 14 мың мұғалімнен 11 мың мұғалім ағылшын тілін оқыту курстарынан өткен. Биыл бұл оқыту аяқталатын болады.

«2020 жылдан бастап мұғалімдерді ағылшын тіліне оқытуға жоспарланған қаражат басқа білім беру мақсаттарына бағытталатын болады, ал ағылшын тілінде пән мамандарын даярлау тек педагогикалық ЖОО-ларда жүргізілетін болады», — деді министр.

Орта білім сапасын арттыру туралы айта отырып, білім және ғылым министрі К. Шәмшидинова «Педагог мәртебесі туралы» заң жобасы депутаттармен, педагогикалық қауыммен талқыланғанын, соның нәтижелері бойынша айтылған ескертулер мен енгізілген ұсыныстарды ескерумен заң жобасы тағы бір рет қайта қарастырылғанын жеткізді. Биыл тамыз айында оны ҚР Парламент Мәжілісінің қарауына енгізу жоспарланған.

БАҚ өкілдерінің сауалдарына жауап бере отырып, К. Шәмшидинова мұғалімдердің зейнетке шығу жасы мәселесі еліміздің зейнеткерлік заңнамасында қарастырылып жатқанын айтты. Ұстаздық қызмет азаматтық қызметкерлер санатына жатады, сондықтан барлығымен бірге қарастырылатын болады.

«Зейнеткерлік бойынша мәселені біз қазір басқа қырынан көтеріп жатырмыз. Егер адам педагогикалық ЖОО-ны бітірген соң бірден мектепте жұмыс істеп, онда үздіксіз қызмет ететін болса, онда зейнетке шығар кезде педагогикалық ЖОО-да оқыған жылдары жалпы еңбек өтілі ретінде есептелетін болады», — деді К. Шәмшидинова.

Мәселен, зейнеткерлік заңнамаға бүгінгі таңда үш бағыт бойынша өзгерістер енгізіліп жатыр. Біріншіден, «педагог» бірыңғай түсінігі енгізіледі.

«Бұрын педагог қызметкері және оған теңестірілген қызметкер болатын. Қазір біз бірыңғай ұғым енгізіп жатырмыз, онда бәрінің құқық бірдей болады. Яғни, бұл норманы іске асыру үшін қосымша бюджет қаражаты қажет болады. Өйткені мұғалім 56 күнтізбелік күн демалады, ал тәрбиеші – 42 күнтізбелік күн демалады. Оны (ескерт. – еңбек демалысын) 56 күнге дейін жеткізу керек», — деді К. Шәмшидинова.

Екінші мәселе — мұғалімдердің құқықтарын қорғау – үш позицияда қарастырылады: педагогтің кәсіби қызметіне араласпау, оның ар-намысы мен абыройын қорғау, сонымен қатар мұғалімдерді олардың келісімінсіз кәсіби тұрғыдан қажетсіз қызмет саласына тартпау

«Біз заңға енгізіп қана қоймай, "Әкімшілік құқық бұзушылықтар туралы" кодекске енгіземіз. Онда нақты нормаларды қоямыз: бірінші – ескерту, одан соң – айыппұл санкциялары. Біз оны басқа санаттар үшін қандай деңгейде қарастырылған болса, сондай деңгейде қарастыратын боламыз», — деді министр.

Балаларын оқытуға қатысты ата-аналардың жауапкершілігі мәселесі бойынша ҚР білім вице-министрі Э. Суханбердиева заңнамада балаларының мектеп сабақтарына келмегені үшін ата-аналардың жауапкершіліктері көзделгенін атап өтті.

«Егер бала белгілі бір күндер ішінде мектепке келмейтін болса, онда мұндай жағдай кәмелеттік жасқа толмағандар ісі жөніндегі комиссияда қаралады. Одан соң прокуратура істі ата-аналардың жауапкершіліктерін анықтау үшін сотқа береді, 3 АЕК және одан жоғары көлемде айыппұл салынуы мүмкін. Бізде БҒМ-да мұндай жағдайлар мен мұндай отбасылар саны ерекше бақылауға алынған», —деді вице-министр.

Баспасөз конференциясы барысында сонымен қатар жоғары білім мәселелері қаралды. Министр К. Шәмшидинова мемлекеттік тапсырыстың ҚР Еңбек және халықты әлеуметтік қорғау министрлігі ұсынатын кадрларға сұраныс негізінде қалыптасатынын айтты. Өткен жылдан бастап мемлекеттік білім беру тапсырысы 20 мың бірлікке артқан.

www.primeminister.kz

2019 жылғы 1 маусымнан бастап бюджет саласының төменгі жалақы алатын қызметкерлерінің жалақысын есептеуге коэффициенттердің жаңа кестесі енгізіледі. Білім беру саласында жүргізіліп жатқан жұмыстар туралы ҚР Үкіметінде өткен баспасөз конференциясында ҚР білім және ғылым министрі Күләш Шәмшидинова айтып берді.

Білім беру ұйымдары қызметкерлері жалақысын 10-нан 30%-ға дейін сараланған түрде ұлғайту жоспарлануда. Коэффициенттер кестесі білім беру деңгейіне, біліктілікке, жұмыс жағдайына қарай:

негізгі буындағы қызметкерлерге: колледж оқытушылары, мұғалімдер, психологтар, әлеуметтік педагогтар, балабақша тәрбиешілері, қосымша білім беру саласының педагогтары;

көмекші қызметкерлер: балабақшалардағы бала бағушылар, мекемелерді тазалайтын қызметкерлерге, аула тазалаушыларға, күзетшілерге;

басқарушы: колледж, мектептер басшылары, балабақша меңгерушілеріне қатысты болады.

«Бюджет саласының аз жалақы алатын қызметкерлерінің еңбекақысын арттыруға бағытталған бөлінген қаражаттың 75% білім саласына жұмсалады», — деді білім және ғылым министрі К. Шәмшидинова.

Сондай-ақ, білім және ғылым министрі 2018 жылдан бастап 208 мың мұғалім (70%) білім берудің жаңартылған мазмұны бойынша 30%-дық қосымша ақы, біліктілік сынақтарын сәтті тапсырған 60 мың мұғалім — 30-50% үстеме ақы алатынын атап өтті.

«Тестілеуге педагогтар жылына екі рет – мамыр және қараша айларында қатысады. Үш жыл ішінде біліктілік арттыру курстарынан орта білім берудің жаңартылған мазмұны бойынша 144 мың мұғалім, 82 мың психолог және сынып жетекшілері, 15 мың колледждің инженерлік-педагогикалық қызметкері, 2,4 мың ЖОО оқытушылары өтеді», — деп ақпараттандырды К. Шәмшидинова.

Оның айтуынша, мектептегі оқу бағдарламаларына интеграциялау, АT-дағдыларды дамыту, жобалық және зерттеу жұмыстарын жүргізу, білім беруді интеграциялау және оларды тәжірибе жүзінде қолдану, оқу жоспарын толықтыратын және балаларды дамытуға бағытталған сыныптан тыс іс-шаралар жалғасады.

ТжКББ және жоғары білім жүйесінде білім беру бағдарламаларын жаңарту еңбек нарығының талаптарын, кәсіптік стандарттарды, WorldSkills стандарттарын, жетекші шетел университеттерімен білім беру бағдарламаларын үйлестіруді, кәсіпкерлік негіздерін, жобалық білім беруді ескере отырып жалғасады.

Студенттерді волонтерлік қызметке тарту туралы Елбасының тапсырмаларын орындау үшін волонтерлік ваучер жүйесін енгізу басталады: 25 сағатқа — 25 мың теңге және екі кредитті қайта тапсырып, 50 сағатқа — 50 мың теңге алып, 5 кредитті қайта тапсырады. Осылайша, белсенді студенттер тек өз бастамаларын көрсетіп қана қоймай, сонымен қатар өздерінің кірістерін көбейтіп, ерекше қажеттіліктері бар балалармен жұмыс жасайды, кәмелет жасқа толмаған девианттық мінез-құлқы бар балалармен, егде жастағы балалармен әлеуметтік жұмыс жүргізіп, репетиторлықпен айналысады.

www.primeminister.kz

Мұрағат

Мамыр
2019
ДсСсСрБсЖмСнЖк
12345
6789101112
13141516171819
20212223242526
2728293031

Мемлекеттік орган басшыларының блог-тұғырнамасы

Өту