Ағымдағы жылы 118 мыңға жуық отбасы баспанамен қамтамасыз етіледі. Бұл туралы бүгін ҚР Индустрия және инфрақұрылымдық даму вице-министрі Қайырбек Өскенбаев айтты.

«Жалпы 2019 жылы 13 млн шаршы метр жаңа тұрғын үй салуды жоспарладық. Осының арқасында 118 мыңға жуық отбасы баспанамен қамтамасыз етілетін болады. Оның ішінде мемлекеттік қаражат есебінен 22 мың пәтер пайдалануға беріледі», - деді Қ.Өскенбаев министрліктің кеңейтілген алқа мәжілісінде.

Оның айтуынша, тұрғын үй және ипотекалық бағдарламалары аясында іске асырылып жатқан қолдау шаралары құрылыс саласынының дамуын ынталандырды. Отандық құрылыс материалдарын жобалауға және құрылыста пайдалануға ерекше назар аударылады. Өткен жылдың қорытындысы бойынша құрылыста қазақстандық өндірушілер үлесі 77 пайызды құрады. Бұл 2017 жылдың көрсеткішінен 5 пайызға артық. Отандық тауар өндірушілердің құрылыс материалдарын, бұйымдарын, конструкцияларын және жабдықтарын пайдалану үшін ағымдағы жылы электрондық тізілім құрылды және іске қосылды. Әрбір өңірде «Атамекен» ұлттық кәсіпкерлер палатасының қатысуымен отандық өнімдерді пайдаланылуына бақылау жасайтын жұмыс топтары мен комиссиялар жұмыс істеп жатыр.

«Үш жыл ішінде тұрғын үй құрылысында жергілікті өндірушілерді қамту деңгейін 90 пайыз дейін жеткізуді жоспарлап отырмыз», - деді вице-министр.

ҚазАқпарат

Үкімет үйінде Қазақстан Республикасының Премьер-Министрі Бақытжан Сағынтаевтың төрағалығымен өткен жұмыс кеңесі барысында Президенттің «Қазақстандықтардың әл-ауқатының өсуі: табыс пен тұрмыс сапасын арттыру» Жолдауында берген тапсырмаларын орындау аясында «қарапайым заттар экономикасы» салаларының өндірістерін дамыту мәселелері қаралды.

Кеңес барысында құрылыс материалдарын шығару, сондай-ақ жеңіл, жиһаз және азық-түлік өнеркәсіптерін дамыту жөніндегі жол карталарының жобалары қаралды. Индустрия және инфрақұрылымдық даму министрлігінің деректері бойынша, жол карталарының негізгі мақсаты — үш сала бойынша өндіріс көлемдерін ұлғайту. Сонымен қатар, отандық тауар өндірушілерді қаржылық және сервистік қолдаудың және олардың бәсекеге қабілеттігін арттырудың, нарықтарды қазақстандық өнімдермен молықтырудың, импортты алмастыруды, инфрақұрылымдық базаны дамытудың, сондай-ақ техникалық реттеу және «сұр» импортпен күрес саласындағы тиімділікті арттырудың қолданыстағы құралдарын жетілдіру мәселелері талқыланды.

Мәселелерді талқылауға Премьер-Министрдің Бірінші орынбасары А. Мамин, Премьер-Министрдің орынбасары Ө. Шөкеев, индустрия және инфрақұрылымдық даму министрі Ж. Қасымбек, ұлттық экономика министрі Т. Сүлейменов, қаржы министрі Ә. Смайылов, ауыл шаруашылығы бірінші вице-министрі А. Евниев, «Қазақстанның индустрияны дамыту институты» АҚ басқарма төрайымы Д. Жүнісова, «Атамекен» ҰКП басқарма төрағасының орынбасары Э. Жұмағазиев қатысты.

www.primeminister.kz

ҚР Ақпарат және коммуникациялар министрі Дәурен Абаев шалғай жатқан ауылдарды цифрлық теледидармен қамту жайында айтты.

Министрдің айтуынша, әлеуметтік аз қамтылған тұрғындарға цифрлық телевизияға қажетті абоненттік құралдар тегін беріледі.

«Ал цифрлық сигналдардан шалғай орналасқан елдімекендер отандық «OTAU TV» спутниктік қабылдағыштарымен (спутниктік тарелкалар) қамтылады. Ол үшін сол аймақтың жергілікті бюджетінен қаржы бөлінген. Сонымен қатар, біз бос тұрған жиіліктерді ұялы байланыс сапасын арттыру мақсатында пайдаланамыз», - деді Д.Абаев министрліктің алқа мәжілісінде. 

Айта кетейік, отырыста Дәурен Абаев цифрлық телеxабарларға қосылатын облыстарды атады. Былтыр елімізде аналогтық теле-радио xабарларды таратуды кезең-кезеңімен тоқтату жұмыстары басталған болатын. Бүгінде төрт аймақ - Маңғыстау, Түркістан, Жамбыл облыстары және Шымкент қаласы толығымен цифрлық теледидарға көшті.

«Осылайша ауылдағы ағайын 15 отандық телеарнаны, ал облыс орталығының тұрғындары 30 арнаны жоғары сапада тамашалап отыр. Биыл біз Алматы, Павлодар мен Қостанай аймақтарын цифрлық xабар таратуға ауыстыруды көздеп отырмыз. Осы бағыттағы жұмыстар 2022 жылы толық аяқталады деген жоспарымыз бар», - деді Д.Абаев министрліктің алқа мәжілісінде. 

ҚазАқпарат

Парламент Мәжілісінің жалпы отырысында «Қазақстан Үкіметі мен Өзбекстан Үкіметі арасындағы Энергетика саласындағы ынтымақтастықтың кейбір мәселелері туралы негіздемелік келісімді ратификациялау туралы» заң жобасы мақұлданды.

«Екі ел соңғы жылдары мұнай мен газ саласында айтарлықтай әлеуетті дамытты. Бүгінде мұнай-газ жеткізу секторындағы өзара іс-қимыл жолға қойылды. Мемлекет басшысының 2017 жылғы 16 қыркүйекте Өзбекстанға жасаған ресми сапары барысында екі ел үкіметтері арасында энергетика саласы бойынша негіздемелік келісімге қол қойылды. Осы келісім негізінде екі ел арасындағы мұнай-газ, мұнай-газ-химиясы және электр энергетикасы саласындағы ынтымақтастық дамытылады», - деді Энергетика министрі Қанат Бозымбаев.

Оның сөзіне қарағанда, көрші мемлекеттердің ынтымағы артуы үшін географиялық жағдайлар ескерілді.

«Аталған келісімді ратификациялау біраз мәселені шешуге мүмкіндік береді. Атап айтсақ, мұнай экспортын ұлғайту үшін Өзбекстанға шикі мұнай жеткізу, күзгі-қысқы кезеңде Қазақстанның оңтүстігін табиғи газбен үздіксіз қамту мәселесі шешіледі» - деді министр.

Қ. Бозымбаевтың атап өтуінше, бүгінде Өзбекстанның мұнайға деген қажеттілігін қамтамасыз ету үшін 2018 жылы 260 мың тоннадан астам мұнай жеткізілді.

ҚазАқпарат

ҚР Мәдениет және спорт министрі Арыстанбек Мұхамедиұлы Мемлекет басшысы қол қойған Қазақстан тарихындағы алғашқы «Кинематография туралы» заңның отандық киноөнерге не беретінін айтып берді.

Астанада өтіп жатқан ҚР Мәдениет және спорт министрлігінің кеңейтілген алқа мәжілісінде Арыстанбек Мұхамедиұлы өз басқаруындағы ведомство ұлттық киноның дамуына ерекше көңіл бөліп келе жатқанын атап өтті.

«Мемлекет басшысы Қазақстан тарихындағы алғашқы «Кинематография туралы» заңға қол қойды. Киноқауымдастық үшін және қазақстандықтар үшін бұл тарихи оқиға болды. Біз барлық прогрессивті әлемде киноөнер - қоғамның дамуына және қоғамдық сананың қалыптасуына ықпал ете отырып, орасан зор әлеуметтік және идеологиялық әсерге ие екенін жақсы түсінеміз. Екіншіден, қазақстандық киноны жаппай прокатта ілгерілетуге жәрдемдесетін және оның шетелдік фильмдер алдында басымдығын қамтамасыз ететін және үшіншіден, ұлттық киноға әлемдік киноға шығуға мүмкіндік беретін заң қабылданды», - деді министр.

Арыстанбек Мұхамедиұлы өз баяндамасында әлеуметтік желіде тараған ақпараттардан да хабардар екенін білдірді.

«Бізде заңды оқымаған кейбір азаматтар биік мінберден сөз сөйлеп, қалжыңмен шабуыл жасағысы келеді. Ал шынтуайтына келгенде бұл заң - бірегей. Мен сіздерге сенімді түрде 1-2 жылдан кейін қазақ киносы халықаралық деңгейде жарқырайтынын айтқым келеді. Себебі, бұл заң барда, біздің керемет режиссерлеріміз бен актерлеріміз барда мықты туындылар өмірге келері анық», - дейді министр.

Арыстанбек Мұхамедиұлы жаңа заң бойынша ұлттық киноларға маңыз берілетінін атап өтті.

«Біздің ұлттық кино 12 пайыздық қосымша құнға салынатын салықтан босатылады. Кино түсіріп жүргендер мұндай жеңілдіктің маңызын біледі. Біз заңда Франция, АҚШ, Ресей мен Қытай, Оңтүстік Корея секілді киноөндірісі дамыған елдердің тәжірибесін негізге алдық», - деді Арыстанбек Мұхамедиұлы.

ҚазАқпарат

Бүгін ҚР Премьер-Министрі Бақытжан Сағынтаевтың төрағалығымен өткен Үкімет отырысында Тұрғын үй құрылыс жинақ банкін және отандық автомобиль жасаушыларды бюджеттік несиелендіру мәселелері бойынша Үкімет Қаулысының жобасы мақұлданды. Аталған мәселеге қатысты индустрия және инфрақұрылымдық даму министрі Ж. Қасымбек баяндама жасады.

Тұрғын үй құрылыс жинақ банк жүйесі бойынша 660,6 млрд теңге жинағы бар 1,3 млн салымшы тіркелген.

Бұл салымшылар мемлекеттік қолдау шаралары есебінен баспаналы болуға ниетті «Нұрлы жер» мемлекеттік бағдарламасының әлеуетті қатысушылары. 44,7 мың салымшының 195,9 млрд теңге жинағы бар (пәтер сомасынан 20% астам).

Өткен жылы банк 38,3 мың займ берді. Бұл 2017 жылдың деңгейінен 47%-ға артық. «2019–2021 жылдарға арналған республикалық бюджет туралы» Заң аясында 2019 жылға 28 млрд теңге бөлу қолдау тапты. Бюджеттік несие Тұрғын үй құрылыс жинақ банкіне 20 жылға беріледі.

Ж. Қасымбек тұрғын үй құрылыс жинақ жүйесі баспана алудың ең тиімді құралдарының бірі екенін атап өтті. Салымшыларға берілетін займдар бастапқы жарнасы 20%-ға дейін болған жағдайда 25 жылға 5%-пен беріледі.

Мәселен, құны 8,4 млн теңге болатын пәтердің (60 шаршы метр екі бөлмелі пәтер) ай сайынғы төлемі 60 мың теңгені құрайтын болады.

Бөлінген қаржы 3111 салымшының қолжетімді займ алуларына мүмкіндік береді. Бұл қаржы алдағы 15 жылда 3 рет айналымда болады, яғни тағы 6 мың салымшыға займ беріледі.

Жеңілдікпен автонесиелеу бағдарламасы 2015 жылы іске қосылды. Ол жеңіл автокөліктерді несиелеуге және коммерциялық техниканы лизингтік қаржыландыруға бағытталған. Бұл бағдарлама аясында 3 жылда 13 992 жеңіл автокөлік, лизингке 747 коммерциялық техника берілді.

Отандық автоөндірушілерді қолдау мақсатында және халықты қолжетімді несиемен қамтамасыз ету үшін бұл тәжірибе жалғасатын болады. Биыл екінші деңгейлі банктерді жеңілдікпен қаржыландыру жолымен «Бәйтерек» ҰБХ» АҚ 10 млрд теңге бөлу жоспарлануда. Оның 8 млрд теңгесі жеңілдікпен автонесиелеуге, ал 2 млрд теңгесі коммерциялық техниканы лизингтік қаржыландыруға беріледі.

Алғашқы кезеңде 2 мыңнан астам автомобиль сату жоспарлануда. Келесі жылдары револьверлік қаражат есебінен бағдарлама бойынша орта есеппен жылына 400-500 отандық автомобиль сатылатын болады.

Министрдің айтуынша, 18 жыл бюджеттік несие беру автомобиль жасау саласын дамытуға мүмкіндік береді. Атап айтқанда:

жалпы сомасы 33,7 млрд теңгенің өнімін сату арқылы қосымша көлемге қол жеткізіледі;

өндірістің жиынтық көлемі шамамен 8 128 автокөлікке жетеді;

ел бюджетіне салық және басқа да міндетті төлемдер көлемі 9,3 млрд теңгеден астам сомаға ұлғаяды.

Қаржы, әділет, ұлттық экономика министрліктерімен келісіліп ұсынылған қаулының жобасында «Бәйтерек» ҰБХ» АҚ бюджеттік қаржыландырудың негізгі шарттары бекітіледі. Жобаны іске асыру үшін қаражаттар мемлекеттік бюджетте қарастырылған және Ж. Қасымбектің айтуынша, жоба теріс әлеуметтік-экономикалық немесе құқықтық салдарға алып келмейді.

«Бәйтерек» ҰБХ» АҚ төрағасы А. Әріпханов бұған дейін бөлінген қаражат отандық автомобильдерді өндірудің тұрақты өсуіне әсер еткенін атап өтті. 2018 жылы 32,3 мың бірлік техника өндірілді. 2018 жылдың қорытындысы бойынша «Қазақстанда жасалған» белгісімен 28,2 мың жеңіл автокөлік сатылды. 2019 жылы «Нұрлы жер» бағдарламасына және республикалық бюджет туралы заңға сәйкес несиелік тұрғын үй құрылысын қаржыландыру айналымын қамтамасыз ету мақсатында 28 млрд теңге бюджеттік несие бөлінеді. Сонымен бірге, Қазақстанның даму банкіне 10 млрд теңгеге бюджеттік несие бөлуді жоспарланып отыр.

Еліміздің өңірлерінде халыққа жеңілдетілген несие беру бағдарламалары қалай іске асырылып жатқаны туралы Астана қаласының әкімі Б. Сұлтанов пен Қостанай облысының әкімі А. Мұхамбетов баяндады.

www.primeminister.kz

Бүгін ҚР Премьер-Министрі Бақытжан Сағынтаевтың төрағалығымен өткен Үкімет отырысында «Цифрлық Қазақстан» мемлекеттік бағдарламасын іске асыру барысы қаралды. Атқарылған жұмыстар туралы ақпарат және коммуникациялар министрі Д. Абаев, индустрия және инфрақұрылымдық даму министрі Ж. Қасымбек, білім және ғылым министрі Е. Сағадиев баяндады.

Премьер-Министр Б. Сағынтаев «Цифрлық Қазақстан» мемлекеттік бағдарламасын іске асыру Елбасының ерекше бақылауына алынғанын атап өтті. Бағдарламаны іске асыру аясында қосылған құнды өсіруді, сондай-ақ экономикадағы шығындарды қысқартуды көздейтін елеулі экономикалық әсер күтілуде.

Бағдарлама іске асырылған былтырғы жылы біраз бағыт бойынша оң динамика бар. Заңнамалық база жетілдіріліп, өндірісті, бизнесті және мемлекеттік басқаруды енгізудің оңтайланған тәсілдері әзірленді. Сонымен бірге Үкіметтің цифрлық күн тәртібін іске асырудың тиімділігін арттыру мақсатында орталық және жергілікті органдардың цифрландырудың әсерін бағалау мен мониторингтеудің бірыңғай әдіснамасын әзірлеу қажеттілігі туралы айтылды.

Ақпарат және коммуникациялар министрлігіне экономиканың жекелеген салаларындағы цифрландырудың әлеуетін белгілеп, сосын шығындардың іс жүзінде қысқаруын ескере отырып, цифрландыру жобаларының тиімділігін есептеудің бірыңғай әдіснамасын жасау, сондай-ақ, мемлекеттік органдармен және АТ-қауымдастықпен цифрлық технологияларды қолдану мәселелері бойынша заң жобасын пысықтауды жетелдету тапсырылды.

ҚР Ақпарат және коммуникациялар министрлігінің деректері бойынша, «Цифрлық Қазақстан» мемлекеттік бағдарламасы негізгі бес бағыттан, 17 бастамадан және 120 іс-шарадан тұрады. 2018 жылы 20 іс-шараны жүзеге асыру жоспарланған болатын. Сол жоспарға сай жұмыстар толық орындалды.

«Экономика салаларын цифрландыру» — бірінші бағыты бойынша келесі маңызды нәтижелерге қол жеткізілді — отын-энергетика және тау-кен металлургия кешендерінде Индустрия 4.0 элементтерін қолдану арқылы:

еңбек өнімділігі орташа есеппен 10%-ға артты;

жекелеген өндірістерде электр қуаты 33%-ға дейін үнемделді;

жабдықтарды пайдалану коэффиценті 50%-ға ұлғайды.

Пайдалы қазбалары бар жеті ірі кен орындарына «Зияткерлік кен орны» және «Цифрлық кеніш» жобалары енгізілді. 2019 жылы осындай жүйе бойынша жұмыс жасайтын нысандар санын 12 бірлікке жеткізу жоспарланып отыр.  

Тау-кен өнеркәсібінде 102 кәсіпорын «айқын» өндіріс деңгейіне ауыстырылды. Көлікті және логистиканы цифрландыру аясында «Зияткерлік көлік жүйесі» жобасы жүзеге асырылып жатыр. Сондай-ақ, жол активтерін басқару жүйесі іске қосылды. Оның аясында 16 жылжымалы жол зертханасы өз жұмысын бастады.

Агроөнеркәсіптік кешенді цифрландыру аясында еліміздің 14 пилоттық шаруашылығында дәлме-дәл егіншілік элементтері енгізілген. Осылайша фермерлердің шығындары орташа есеппен 15-20%-ға азайып, астық өнімі 2,5 есеге артты. 2019 жылы «смарт фермаларды» 500 шаруашылыққа дейін жеткізу жоспарланған.

Бағдарламаның тағы бір негізгі бағыты — онлайн сауда жүйесін дамыту. Электронды сауда субъектілеріне қатысты заңнамалық деңгейде салық жеңілдіктері қарастырылған. Бұл жеңілдіктерді е-коммерцияның 331 жаңа субъектісі пайдаланып үлгерді. Қазақстанда ақшасыз, ұялы телефон арқылы қолма-қол есептесу әлемдік трендтерінің бірі дамуда. Мәселен 2018 жылдың қараша айының соңында еліміздегі алты ірі банк пилоттық режимде осы сервиске қосылды.

«Цифрлық мемлекетке көшу» бағыты аясында бүгінгі таңда білім беру саласының барлық деңгейі цифрландырумен қамтылған. Мектепке дейінгі білім беретін ұйымдардың 64%-ы электрондық түрде өтініштер қабылдайды. Ал мектептердің 94%-ында оқушылар электрондық күнделіктер мен журналдарды пайдаланады. Жалпы, бұл бағытты цифрландыру ауылдық және қалалық мектептер арасындағы алшақтықты 30% төмендетуге мүмкіндік берді.

Денсаулық сақтауды цифрландыру шеңберінде электронды құжат беруге медициналық ұйымдардың 99,2% ауысты. Қазақстанның 16,3 млн тұрғынында өңірлік электрондық денсаулық паспорты бар. Дәрігердің қабылдауына бару, сағаттап кезек күту екі есе азайды. Ал анализдердің қорытындысын алу уақыты 2,5 есеге дейін төмендеді. 2019 жылы электрондық денсаулық сақтау паспорттарымен қамтамасыз етуді 100%-ға жеткізу жоспарланып отыр.

Әлеуметтік-еңбек саласын цифрландыру аясында электрондық еңбек биржасы өз тиімділігін дәлелдеді. 2018 жылы 533 мыңнан аса жұмыс іздеуші жұмысқа орналасты, оның ішінде 409 мың азамат тұрақты жұмыс орынын тапты.

Көрсетілетін мемлекеттік қызметтерді электронды форматқа ауыстыру жұмыстары да жалғасып жатыр. Қазіргі уақытта 752 кмемлекеттік қызметтің 506 түрі автоматтандырылды. Яғни қызмет көрсету уақытын 40%-ға қысқартуға мүмкіндік берді. Бұл орта есеппен алғанда 12 күннен 7 күнге дейінгі мерзім. Сонымен қатар, қағаз айналымы 60 млн анықтамаға дейін қысқарған. 2018 жылы ел тұрғындарына 30 млн қызмет электронды форматта көрсетілді. Астана мен Алматы қалаларында 3 көші-қон, 8 мамандандырылған, 16 цифрлық халыққа қызмет көрсету орталықтары ашылып, биометрикалық деректер жинау жүйесі іске қосылды. Биыл мемлекеттік қызметтердің 80%-ын электрондық форматқа көшіру, сондай-ақ, 1 цифрлық және 5 көші-қон ХҚКО ашу жоспарланған.

Мемлекеттік бағдарлама аясында шағын және орта бизнесті қолдауға ерекше көңіл бөлінген. 2018 жылы кедендік рəсімдерді онлайн орталықтан бақылауға, баж төлемін есепке алуды жүргізуге мүмкіндік беретін «АСТАНА-1» ақпараттық жүйесі іске қосылды. Кедендік декларацияларды шығару үшін бұған дейін бірнеше күн және бірнеше сағат қажет еді, ал қазір 1 минутқа дейін қысқартылды. Бүгінде жүйеде 859 мың электрондық декларация тіркелген, оның 85%-ы 1 минут ішінде «жасыл дәліз» арқылы рәсімделген. «Электрондық шот-фактуралар», «тауарларды таңбалау» жүйелері іске асырылды, бұл «көлеңкелі» экономиканы азайтуға мүмкіндік береді.

«Жалпы, 2018 жылы іске асырылған цифрлық шаралар қазірдің өзінде елімізге 218 млрд теңгеден астам экономикалық пайда әкелді. Цифрландыру есебінен құрылған жаңа жұмыс орындарының саны 43 мыңнан асады. Биыл жұмыс тәртібі толық орнықты, мемлекеттік органдардың жауапкершілік аумағы іріктелді, ұлттық және жеке компаниялар алдағы мақсаттарын айқындап алды. Сондықтан да жаңа технологияларды енгізуден түсетін экономикалық әсер алдағы уақытта қазіргі нәтижелерден де жоғары болады деп нық сеніммен айтуға болады», — деп мәлімдеді Д. Абаев.

Өз кезегінде, Индустрия және инфрақұрылымдық даму министрі Ж. Қасымбек «Цифрлық Қазақстан» бағдарламасы аясында басым жобалар өнеркәсіп, көлік, тұрғын үй-коммуналдық шаруашылығы, геология және жер қойнауын пайдалану салаларында іске асып жатқанын айтты.

2018 жылы Өнеркәсіпті цифрландыру бойынша жеті модельдік фабрикада аудит аяқталды және оларды цифрландыру үшін жол карталары бекітілді. Әр кәсіпорынға шамамен 30 іс-шара ұсынылды. Сонымен қатар, өңірлердің өнеркәсіптік кәсіпорындарын цифрландыру жұмыстары жүргізіліп жатыр. ҚР ИИДМ мен әкімдіктер бірлесіп, орта және ірі өнеркәсіп нысандарына цифрлық технологияларды енгізу жөніндегі жол картасын бекітті. Биыл 100-ден астам кәсіпорынды цифрландыру жұмыстары белсенді түрде жалғасатын болады.

«Көлікті және логистиканы цифрландыру» міндеті бойынша «Зияткерлік көлік жүйесі» (ЗКЖ) жобасы іске асырылып жатыр. Жүйе жол-көлік кешенін басқарудың бірқатар мәселелерін шешуге мүмкіндік береді. Мәселен, көлікті бақылауды автоматтандыру үшін 12 арнайы автоматтандырылған өлшеу құралы енгізілді. Биыл жыл соңына дейін жаңа ақылы учаскелерде тағы да 11 арнайы автоматтандырылған өлшеу құралын іске қосу жоспарланып отыр. 2021 жылға қарай олардың жалпы санын 46 бірлікке дейін жеткізу жоспарлануда.

Жолаушылар тасымалдау саласында қозғалыс кестесін, бағдарын және жиілігін сақтауды қамтамасыз ету мақсатында пилоттық режимде Облысаралық және халықаралық жолаушылар тасымалын диспетчерлеу жүйесі іске қосылды. 2019 жылдың соңына дейін 416 бағдар бойынша 2 мыңнан астам автобус іске қосылады.

Жолдардың жағдайын жақсарту мақсатында «Жол активтерін басқару жүйесі» тәжірибе ретінде енгізді. Бұл жүйе таңдалған жөндеу стратегиясына байланысты қажетті инвестициялар көлемін және жолдардың техникалық жағдайын болжайды.

Зияткерлік көлік жүйесінің маңызды компоненттерінің бірі— ақы алу, сондай-ақ жол жағдайы бойынша ақпарат жинау және оны көлік жүгізушілерге ұсыну жүйесі. Бүгінде Алматы — Қапшағай, Алматы — Қорғас және Астана — Теміртау учаскелерінде жалпы ұзындығы 471 шақырым болатын ақы алу жүйесі пайдалануға берілді. Жалпы 2020 жылға дейін ұзақтығы 6,5 мың шақырым болатын 16 учаскеге ақы алу жүйесін енгізу жоспарлануда.

E-SHANYRAQ жобасын іске асыру аясында 2018 жылдың соңында пилоттық режимде Тұрғын үй-коммуналдық шаруашылық саласының Бірыңғай Ақпараттық Жүйесі іске қосылды. Соның нәтижесінде жүйеге 5 217 көппәтерлі тұрғын үйдің электронды техникалық паспорты енгізілді және 5 767 түрлі есептеу құралдары қосылды.

Құрылыс саласында Е-QURYLYS бірыңғай ақпараттық жүйесі енгізілуде. Жүйе блокчейн режимінде нысан құрылысы басталғаннан аяқталғанға дейінгі барлық процесті бақылауға мүмкіндік береді.

Білім және ғылым министрі Е. Сағадиев Қазақстан Республикасы Президентінің Жолдауына және «Цифрлық Қазақстан» бағдарламасына сәйкес білім беру саласында цифрлық технологияларды дамыту бойынша бірқатар шаралар орындалып жатқанын, осы мақсатта цифрландыру офисі құрылғанын атап өтті.

1–4 сыныптарға арналған «Ақпараттық-коммуникациялық технологиялар» пәні бойынша типтік оқу бағдарламасы бекітілді. Осы оқу жылынан бастап 3-сыныпта оқыту басталды. Келесі оқу жылынан бастап кезең кезенмен қалған сыныптар кіріседі.

«100 нақты қадам» Ұлт жоспарының 76 қадамына сәйкес мектептерде «Информатика» пәнін оқыту 5–9 сыныптарда аптасына 1 сағат немесе жылына 34 сағат және 10–11 сыныптарда аптасына 2 сағат немесе жылына 68 сағатқа дейін көбейді. Сонымен қатар, «Информатика» пәні бойынша оқу бағдарламаларының мазмұны қайта қаралып, мектепте роботты техника, 3D модельдеу және машинамен оқытудың жүйелері саласында заманауи бағдарламалау тілдері енгізілді.

2018 жылы ірі кәсіпорындарда, жоғары оқу орындары кафедраларының 12 бөлімшелері ашылды. Бүгінгі күні 10 жоғары оқу орнымен практикалық және зертханалық сабақтар өткізу үшін өндірістен кадрлар тартылды. 6 жоғары оқу орны базасында ақпараттық технологиялар, киберқауіпсіздік, ақпараттық қауіпсіздік бойынша біліктілік орталықтары ашылды.

Ақпараттық технологиялар саласында қажетті мамандықтар бойынша мемлекеттік тапсырыс көлемі ұлғайды. 2018 жылы АТ мамандығы бойынша 10 мыңнан астам грант бөлінді.

Мемлекеттік бағдарламаның 87-тармағын іске асыру мақсатында Қ.И. Сәтбаев атындағы университет базасында өнеркәсіптік автоматтандыру және цифрландыру институтын құру бойынша жұмыстар жүгізіліп жатыр.

Жоғары оқу орындарының академиялық және басқару дербестігін кеңейту мәселелері бойынша Заң қабылданды. Осы жылы ҚР БҒМ 20-дан астам эксперименттік білім беру бағдарламасын бекітті. Осы оқу жылынан бастап бұл бағдарламалар 8 жоғары оқу орнына енгізілді.

Сондай-ақ, ашық білім берудің ұлттық платформасын құру жұмыстары жүргізілуде. Платформада әртүрлі білім курстары, соның ішінде 3D модельдеу, ақпараттық қауіпсіздік, бағдарламалау, АT тілдері және т.б. курстар болады. Сонымен қатар, білім беруді және ғылымды бірыңғай басқару жүйесін құру бойынша жобаларды іске асырылып жатыр.

www.primeminister.kz

Қазақстан Республикасы Үкіметінің қаулысымен Алексей Владимирович Цой басқа жұмысқа ауысына байланысты ҚР денсаулық сақтау вице-министрі қызметінен босатылды.

www.primeminister.kz

Сейсенбі күні, 19 ақпанда, сағат 10:00-де Үкімет үйінде ҚР Үкіметінің отырысы өтеді.

Отырыстың күн тәртібінде:

«Цифрлық Қазақстан» мемлекеттік бағдарламасын іске асыру барысы;

«Қазақстанның тұрғын үй құрылыс жинақ банкі» АҚ және отандық автомобиль жасаушыларды бюджеттік несиелендіру.

Тікелей таратылымды PrimeMinister.kz сайтынан, Фейсбук, «Вконтакте», Твиттер, Перископ әлеуметтік желілерінен, Ютуб ресми арнасынан, сондай-ақ Андроид пен Айфонның мобильдік қосымшаларынан көре аласыздар.

www.primeminister.kz

Ауылдың әлеуметтік-экономикалық жағдайы қаламен теңесе бастайтын болса, ауылдың оты ешқашан өшпейді деп ойлаймын. Бүгін Парламент Мәжілісіндегі Үкімет сағатында ҚР Қоғамдық даму министрі Дархан Кәлетаев осылай мәлім етті.

«Өздеріңіз көріп отырсыздар, Елбасының Жастар форумында берген тапсырмаларының бәрі де аса маңызды және олар өз деңгейінде орындалатын болады. Осы тұста, мына жайтқа да тоқталғым келеді. Бұл - ауыл жастарының мәселесі. Шыны керек, осы жерде отырған көбіміз ауылдан шықтық. Ауыл - Қазақстанның алтын бесігі, біз үшін сакралды туған жер.  Жастар жылында біз ауыл жастары мәселесін жан-жақты шешудің жолдарын қарастырып жатырмыз. Оның ішінде,Елбасы айтқандай, «Дипломмен - ауылға» бағдарламасы арқылы ауылға барған жастардың алғашқы жәрдемақысы 100 айлық есептік көрсеткішке өсіп отыр», - деді министр.

Оның сөзіне қарағанда, ведомство ауылға баратын жас мамандар үшін арнайы кәсіпорындарда квотаның санын ұлғайту, білім гранттарын көбейту мәселесін қарастырып жатыр.

«Ауылдық жердегі инфрақұрылымды жаңарту, жаңа жұмыс орындарын, медициналық-мәдени ошақтардың құрылысын салу Аумақтық даму жоспарларына нақты енгізілуі қажет деп есептейміз. Сондай-ақ, «Серпін», «Жас маман», «Жас кәсіпкер» бағдарламаларының  мақсаты бір - ауыл жастарының ахуалын жақсарту. Әрине, бүгінгідей урбанизациялық, цифрлық, жоғары технологиялық дәуірде ешкімді ауылға байлап отыра алмайсың. Алайда, тым болмағанда, ауылдың әлеуметтік-экономикалық жағдайы қаламен теңесе бастайтын болса, ауылдың оты ешқашан өшпейді деп ойлаймын!», - деді Дархан Кәлетаев.

ҚазАқпарат

Мұрағат

Наурыз
2019
ДсСсСрБсЖмСнЖк
123
45678910
11121314151617
18192021222324
25262728293031

Мемлекеттік орган басшыларының блог-тұғырнамасы

Өту