QR Premer-Mïnïstri Kärim Mäsimovtiñ törağalığımen Ükimettiñ selektorlıq keñesi ötti

Bastı > Bölimder > Jañalıqtar > Bastı jañalıq > 2008 > Mamır > QR Premer-Mïnïstri Kärim Mäsimovtiñ törağalığımen Ükimettiñ selektorlıq keñesi ötti

QR Premer-Mïnïstri Kärim Mäsimovtiñ törağalığımen Ükimettiñ selektorlıq keñesi ötti

QR Premer-Mïnïstri Kärim Mäsimov Ükimettiñ selektorlıq keñesinde Energetïka jäne mïneraldıq reswrstar mïnïstri Sawat Mıñbaevqa bir aptanıñ işinde munay önimderine baylanıstı keşendi şaralardı şeşwdi tapsırdı.

2008 jıldıñ basında munay önimderiniñ bağası turaqtı sïpatta bolğanın aytqan S. Mıñbaev: «Säwir ayınıñ ekinşi on kündiginen bastap işki narıqta joğarğı oktandı benzïnniñ bağası lïtrine 1-2 teñgege, al dïzel otınınıñ bağası 2-3 teñgege öskeni bayqalwda», dedi. Onıñ aytwınşa, benzïnniñ qımbattawı älemdik narıqtağı munay bağasınıñ köterilwne baylanıstı bolıp otır.

S. Mıñbaevtıñ sözine qarağanda, 2008 jıldıñ basınan beri munay kompanïyaları 23 mln. 568 mıñ tonna munay öndirse, Qazaqstandağı munay zawıttarında 4 mln. 131 mıñ tonna munay öñdelgen. Bul körsetkiş ötken jıldıñ osı kezeñindegimen salıstırğanda 105,4 payızğa teñ.

Ağımdağı jılğı qañtar-säwir aylarında elimizdiñ munay öñdew zawıttarı 827,1 mıñ tonna benzïn, 1 mln. 111 mıñ tonna dïzel otının, 916,7 mıñ tonna mazwt öñdegen.

Ağımdağı jılğı köktemgi egis jumıstarı ötken jılğa qarağanda joğarı deñgeyde jürgizilwde. Bul twralı bügin Ükimette ötken selektorlıq keñeste Awıl şarwaşılığı mïnïstri Aqılbek Kürişbaev mälim etti.
Tuqımnıñ surıptılığın tekserwge 2 mïllïon tonnağa jwıq tuqımdıq materïal tüskenin jetkizgen A. Kürişbaev, onıñ 98,5 payızı tekserilgenin jäne 98,4 payızı surıptı dän bolıp tanılğanın ayttı.

Qazirgi waqıtta elimizdiñ barlıq öñirlerinde köktemgi egis jumıstarı atqarılıp jatqandığına toqtalğan mïnïstr: «oblıs äkimderiniñ mälimeti boyınşa, ılğaldılıqtı saqtaw üşin topıraqtı tırmalaw jumıstarı josparlanğan egistik jerde bul şaralar tügelimen atqarılğan. Sonımen qatar köktemgi jer jırtw jumıstarı ayaqtalwğa jaqın»,-dedi.
Mïnïstrdiñ aytwınşa, qazirgi kezde egis nawqanı Oñtüstik Qazaqstan, Aqtöbe, Qızılorda, Jambıl, Almatı, Şığıs Qazaqstan jäne Batıs Qazaqstan oblıstarında jürgizilwde. Aldın ala jasalğan taldaw jumıstarına qarağanda, bïılğı jılı egistik awmağı ötken jılmen salıstırğanda artıp otır. Mäselen, bïday egisi 573 mıñ gektarğa, maylı daqıldar 97,8 mıñ gektarğa, qant qızılşası 5,6 mıñ gektarğa, kökönis jäne baqşa daqıldarı 4,5 mıñ gektarğa ulğayğan.

Mamırdıñ 5-i küni Ükimette ötken selektorlıq keñeste Energetïka jäne mïneraldı reswrstar mïnïstri Sawat Mıñbaev munay önimderin eksporttawdı rettewge baylanıstı keşendi şaralar qabıldaw qajet ekenin mälim etti.
«Munay önimderin eksporttawdıñ balansın baqılaw mäselesi boyınşa qosımşa taldaw jasawğa 3-4 kün waqıt berwdi suraymız», dedi mïnïstr Ükimet basşısına.
S. Mıñbaevtiñ aytwınşa, 2008 jıldıñ birinşi toqsanında Qazaqstannan eksporttalğan dïzel otınınıñ kölemi 279 mıñ tonnanı qurağan jäne bul körsetkiş ötken jıldıñ osı kezeñimen salıstırğanda 1,5 esege joğarı. Sonımen qatar benzïn de 1,5 esege artıq eksporttalğan.
Jalpı 2008 jıldıñ birinşi toqsanında elimizden eksporttalğan 42 mıñ tonna benzïnniñ 36 mıñ tonnası TMD elderine tasımaldanğan, onıñ işinde 24 mıñ tonnası Qırğızstanğa şığarılğan.

Azıq-tülik tawarlarına joğarı bağa Atıraw oblısı men Almatı jäne Astana qalalarında saqtalıp otır. Bul twralı Ükimette ötken selektorlıq keñeste Ïndwstrïya jäne sawda mïnïstri Vladïmïr Şkolnïk mälim etti.

Onıñ aytwınşa, elimizde säwir ayında nawrız ayımen salıstırğanda süt jäne qus etine bağa 1 payızğa tömendegen. Sonımen qatar kökönis bağası da arzandağan.

Jaqında Ükimette ötken keñeste işki narıqtı künbağıs mayımen, qant, küriş jäne basqa azıq-tülik tawarlarımen qamtamasız etw mäselesi oblıs äkimderi orınbasarlarınıñ qatıswımen talqılanğanın jetkizgen mïnïstr, äkimderge 10 künniñ işinde qant pen ösimdik mayın öndirwşilermen elimizdiñ öñirlerin atalğan önimdermen qamtamasız etwge baylanıstı memorandwmğa qol qoyu tapsırılğanın ayttı.

Bul memorandwmda qant pen ösimdik mayın satatın käsiporındardıñ tizimi körsetilip, öndirwşilerdiñ atalğan tawardı satatın bağası men kölemi jäne merzimi belgilenetin boladı.

QazAqparat