Ükimette ötken selektorlıq keñeste qısqı jılıtw mawsımına dayındıq,«Qazaqstannıñ 30 korporatïvtik köşbasşısı» bağdarlamasınıñ jüzege asırılwı twralı, Qazaqstan «Beynew-Bozoy-Şalqar-Aqbulaq» magïstraldı gaz qubırınıñ qurılıs jobasına qatıstı mäseleler talqılandı

Bastı > Bölimder > Jañalıqtar > Bastı jañalıq > 2008 > Tamız > Ükimette ötken selektorlıq keñeste qısqı jılıtw mawsımına dayındıq,«Qazaqstannıñ 30 korporatïvtik köşbasşısı» bağdarlamasınıñ jüzege asırılwı twralı, Qazaqstan «Beynew-Bozoy-Şalqar-Aqbulaq» magïstraldı gaz qubırınıñ qurılıs jobasına qatıstı mäseleler talqılandı

Ükimette ötken selektorlıq keñeste qısqı jılıtw mawsımına dayındıq,«Qazaqstannıñ 30 korporatïvtik köşbasşısı» bağdarlamasınıñ jüzege asırılwı twralı, Qazaqstan «Beynew-Bozoy-Şalqar-Aqbulaq» magïstraldı gaz qubırınıñ qurılıs jobasına qatıstı mäseleler talqılandı

Aldağı qısqı jılıtw mawsımına dayındıq mäselesi qazannıñ 1-ine deyin tolıq şeşilwi tïis. Bügin Ükimette ötken selektorlıq keñeste qısqı jılıtw mawsımına dayındıq mäselelerine oray tïisti organdardıñ bayandamaların tıñdağannan keyin Premer-Mïnïstr Kärim Mäsimov osınday tapsırma jüktedi.
«Qısqı mawsımğa qatıstı dayındıqtı jiti baqılawğa alw qajet. Energetïka jäne mïneraldıq reswrstar mïnïstrligi jılıtw mawsımına äzirlik barısı josparın baqılawda ustap, jağdaydı apta sayın bayandap turwı tïis. Al Kölik jäne kommwnïkacïya mïnïstrligi «QazMunayGaz» UK-men, «Qazaqstan temir jolı» AQ-men birlese otırıp otın jetkizwdi baqılasın. Jalpı jılıtw mawsımına dayındıq mäselesi qazannıñ 1-ine deyin tolıq şeşimin tabwı tïis», dedi Ükimet basşısı.
Energetïka jäne mïneraldıq reswrstar mïnïstrliginiñ mälimetterine süyensek, bügingi küni respwblïka elektr stansalarında 2,7 mln. tonna kömir men 132 mıñ tonna mazwt bar. Bul ötken jılğı salıstırmalı kezeñmen salıstırğanda birşama joğarı körsetkiş bolıp tabıladı. Sonımen birge, bügingi küni jerastı gazsaqtaw orındarınan 1 mlrd. 557 tekşe metr gaz alınğan.

Älewmettik nısandardıñ qısqı mawsımğa dayındığın erekşe baqılawğa alw qajet. Bügin Ükimette ötken selektorlıq keñeste qısqı jılıtw mawsımına dayındıq mäseleleri talqılanıp, Premer-Mïnïstr Kärim Mäsimov barlıq äkimderge älewmettik nısındardıñ äzirligine erekşe mañız bölwdi tapsırdı.

Jïın barısında Bilim jäne ğılım mïnïstri Janseyit Tüymebaev äkimderdiñ nazarın qısqı jılw berw mawsımına dayındıqtı küşeytw mäselesine awdartqan bolatın. Mïnïstrdiñ aytwınşa, respwblïkadağı mektepterdiñ 81 payızı jeke jılw ortalıqtarın paydalanadı. Onıñ işinde 47 payızı qısqı mawsımğa dayın.

Osı mäselege erekşe toqtalğan Premer-Mïnïstr Kärim Mäsimov jılıtw mawsımına äzirlik barısında bilim berw, bala baqşa, densawlıq mekemeleri sekildi älewmettik nısandarğa basa köñil bölwdi tapsırdı. «Qısqı äzirlik büginnen bastaladı. Sondıqtan kez-kelgen awdannıñ awmağında tïisti şaralar qamtılmay, qısqı jılıtwğa baylanıstı qanday da bir problema twındaytın bolsa, soğan jawaptı tulğa birden jumıstan bosatıladı. Mektep, densawlıq saqtaw, bala-baqşa, awrwxana sekildi älewmettik nısandardıñ qısqı mawsımğa dayındığı erekşe baqılawda bolwı tïis», dedi Ükimet basşısı.

Ükimette ötken selektorlıq keñeste Premer-Mïnïstr Kärim Mäsimov «30 korporatïvtik köşbasşı» bağdarlaması ayasında awıldıq jerlerdi telefonmen qamtamasız etwdi erekşe qadağalaw qajettigin atap ötti.
«Ötken jolı Ükimettegi keñeste jergilikti özin-özi basqarw twralı mäseleni talqılağan bolatınbız. Sol waqıtta awıldıq jerlerdi jetkilikti deñgeyde telefon baylanısımen qamtamasız etpeyinşe, jergilikti özin-özi basqarwdıñ jumıs jasay almaytınına nazar awdarılğan bolatın. Şındığında, awıldıq jerlerdi telefonmen qamtamasız etpeyinşe, tömengi deñgeydegi (jergilikti özin-özi basqarw deñgeyindegi) byudjetterdi qalıptastırw mümkin bolmaydı. Sonımen birge, awıldı telefonmen qamtamasız etw jobasınıñ ekonomïkalıq qana emes, ülken älewmettik-sayasï mäni de bar», dedi K. Mäsimov. Osı aytılğan mäselelerge oray, Ükimet basşısı awıldı telefonmen qamtamasız etw bağıtındağı ilki jobanı jüzege asırwdı erekşe qadağalaw qajettigin tapsırdı.

Ağımdağı jılı «30 korporatïvtik köşbasşı» bağdarlaması ayasında jalpı qunı 1 mlrd. 400 mln. dollar bolatın 6 jobanı jüzege asırw josparlanwda. Bul twralı bügin Ükimettiñ selektorlıq otırısında «Qazaqstannıñ 30 korporatïvtik köşbasşısı» bağdarlamasınıñ jüzege asırılwı twralı bayandama jasağan QR Ekonomïka jäne byudjettik josparlaw mïnïstri Baqıt Sultanov mälim etti.

Mïnïstrdiñ aytwınşa, «30 korporatïvtik köşbasşı» bağdarlaması ayasında 2009 jılı jalpı qunı 1 mlrd. 800 mln. dollar bolatın qosımşa 4 jobanı engizw közdelip otır. Al bügingi küni on bes joba türli satıda jüzege asırılıp jatır. Qalğan 19 jobanıñ texnïkalıq qujattarı äzirlenwde. «Jalpı alğanda Bağdarlama tabıstı atqarılıp keledi. Ärbir ilki jobağa baylanıstı, olardıñ jüzege asırılwına beynemonïtorïng jürgizilwde», dedi B. Sultanov. Onıñ sözine qarağanda, ilki jobalar boyınşa bazalıq tizbekte qamtılğan 45 jobadan basqa, bügingi küni bïznes-qawımdastıqtıñ tarapınan bağdarlamağa qatıswğa tağı da 58 tapsırıs berilgen.

Kölik jäne kommwnïkacïyalar mïnïstrligi ağımdağı jıldıñ qazan ayında «Batıs Ewropa-Batıs Qıtay» jobasın koncessïyalıq negizde jüzege asırwğa tender jarïyalaydı. Bul twralı Ükimettiñ selektorlıq keñesinde Premer-Mïnïstrdiñ orınbasarı Ömirzaq Şökeev mälim etti.

Onıñ aytwınşa, «Qazaqstannıñ 30 korporatïvtik köşbasşısı» bağdarlamasına engen atalmış iri jobanı koncessïyalıq negizde jüzege asırwğa qatıswğa nïet tanıtwşılar öte köp. «Bul joba qunınıñ üşten biri koncessïyalıq negizde jeke ïnvestïcïyalardıñ esebinen qarjılandırılatın boladı. Sonımen qatar, jobanı jüzege asırw jumıstarın xalıqaralıq qarjı ïnstïtwttarınıñ zaemdarı esebinen qarjılandırw mäselesi pısıqtalwda. Atap apytqanda, Ewropa qayta qurw jäne damw banki Resey şekarasınan Aqtöbege deyingi wçaskeni, Dünïejüzilik bank Aqtöbe oblısınıñ şekarasınan bastap Qızılorda—Şımkent wçaskeni, Ïslam damw banki Oñtüstik Qazaqstan oblısınıñ şekarasınan Tarazğa deyingi wçaskeni al Azïya damw banki Taraz-Almatı oblısı wçaskesin qarjılandırwğa dayın», dedi Ö. Şökeev.

Onıñ sözine qarağanda, qazirgi waqıtta atalmış jobanı jüzege asırw jumıstarı jürgizilip jatır. Jobalaw isimen 12 ïnstïtwt aynalıswda. Joba boyınşa jobalıq qujattar osı jılı tolıq ayaqtalatın boladı. «Jumıs komïssïyası eki aptada bir ret turaqtı bas qosıp otır. Biz jobanı atqarw jumıstarına monïtorïng jürgizwdemiz. İs jüzinde jumıs jopar boyınşa jürwde», dedi vïce-premer. Ol atalmış kölik däliziniñ jalpı uzındığı 1882 şaqırım bolatının atap ayttı.

Ağımdağı jılı 6 ilki jobanı qarjılandırw üşin respwblïkalıq byudjetten 64,6 mlrd. teñge qarastırıldı. Bul twralı bügin Ükimettiñ selektorlıq otırısında «Qazaqstannıñ 30 korporatïvtik köşbasşısı» bağdarlamasınıñ jüzege asırılwı twralı bayandama jasağan QR Ekonomïka jäne byudjettik josparlaw mïnïstri Baqıt Sultanov mälim etti.

Mïnïstrdiñ aytwınşa, «30 korporatïvtik köşbasşı» bağdarlaması ayasında Premer-Mïnïstrdiñ tarapınan 30 joba maquldanğan. Sonımen birge, Memleket basşısınıñ tapsırmasına oray, atalğan bağdarlama ayasında jalpı qunı 54 mlrd. dollardıñ 45 ilki jobasın qamtıytın «bazalıq tizbek» qurılımdalğan.

«İlki jobalardı jüzege asırw üşin memlekettik qoldaw jasaw maqsatında ağımdağı jılı 6 jobanı qarjılandırwğa 64,6 mlrd. teñge bölindi. Barlıq jobalar boyınşa qarjılandırw nusqası jasaldı. Al memleket tarapınan qarjılandırılwı talap etiletin jobalarğa şamamen 700 mlrd. teñgeniñ şığındarı qarastırılwda. Bul şığındar aldağı üşjıldıq byudjetke de engizildi», dedi mïnïstr. Onıñ aytwınşa, bağdarlama ayasındağı üş ilki joba boyınşa memlekettik kepil 365 mln. dollar köleminde usınılğan. Sonday-aq, Qazaqstan damw banki segiz, Ewrazïyalıq damw banki 1 joba boyınşa kredïttik jeli aşqan.

«30 korporatïvtik köşbasşı» bağdarlaması ayasındağı jalpı qunı 13,1 mlrd. dollardı quraytın 11 joba ulttıq kompanïyalardıñ qatıswımen jüzege asadı.
Bul twralı Ükimettiñ selektorlıq otırısında «Qazaqstannıñ 30 korporatïvtik köşbasşı» bağdarlamasınıñ jüzege asırılwı twralı bayandama jasağan QR Ekonomïka jäne byudjettik josparlaw mïnïstri Baqıt Sultanov mälim etti.
«Bügingi küni Astana qalasınıñ ïndwstrïaldı parkinen tört ilki jobanı jüzege asırw üşin arnayı jer telimderi bölinip, ïnfraqurılım jumıstarı bastalwda. Sonımen birge, 26 joba naqtı jüzege asırılw satısında tur. Jobalardı jüzege asırw barısında 8 ilki joba boyınşa ïnvestïcïyalıq preferencïyalar, salıqtıq jäne kedendik jeñildikter usınıldı. Tağı üş joba Ïndwstrïya jäne sawda mïnïstrliginiñ Ïnvestïcïya jönindegi komïtetiniñ qarawında jatır», dedi B. Sultanov.

Qazaqstan «Beynew-Bozoy-Şalqar-Aqbulaq» magïstraldı gaz qubırınıñ qurılısı jobasına qatıswğa Qıtaydı şaqırıp otır. Bul twralı bügin Ükimettegi selektorlıq keñeste vïce-premer Ömirzaq Şökeev mälim etti.
Talqılaw nätïjesinda atalmış jobanıñ 50 payızın byudjet qarjısı, qalğan 50 payızın jeke ïnvestorlardıñ qarjısı esebinen qarjılandırw jöninde şeşim qabıldanğanın aytqan Ö. Şökeev: «Qazaqstan-Qıtay ükimetaralıq komïssïyasınıñ kelisimine säykes, Energetïka jäne mïneraldıq reswrstar mïnïstrligi Qıtay Xalıq Respwblïkasına atalmış jobağa qatıswğa usınıs jasadı. Bul bağıtta perspektïva bar», dedi.
Ö. Şökeevtiñ sözine qarağanda, qanday jağdayda bolmasın jobanıñ 50 payızı şarwaşılıq swbektiler esebinen qarjılandırılatın boladı. Bul jumıstı «QazMunayGaz» UK nemese basqa ïnvestor qarjılandırıp qalwı mümkin. Bul 50 payız qarjı keyinnen tarïfter esebinen aqtalatın boladı. Byudjetten bölinetin 50 payız qarjı jobağa memlekettiñ qosqan ülesi bolıp tabıladı.

«Gaz qubırınıñ jalpı uzındığı 1510 şaqırım. Onıñ birinşi kezeñin 2011-şi jıldıñ şildesine deyin ayaqtaw josparlanıp otır. Biz osı gaz qubırı arqılı elimizdiñ oñtüstigine 5 mlrd. tekşe metr gaz bere alatın bolamız. 2014-şi jılı gaz qubırınıñ ekinşi kezeñin paydalanwğa berw közdelip otır. Bul onıñ qwattılığın 10 mlrd. tekşe metrge deyin ulğaytwğa mümkindik beredi», dedi Ö. Şökeev. Ol qazirgi waqıtta joba boyınşa juıs qarqındı jürip jatqanın atap körsetti.

«Bul joba is jüzinde 6-7 mln. adamnıñ ömir jağdayınıñ sapasın özgerte aladı. Sondıqtan da bul biz üşin sayasï jağınan da, älewmettik turğıdan da öte mañızdı joba bolıp tabıladı», dep qostı Ö. Şökeev.

Ükimette ötken selektorlıq keñeste «30 korporatïvtik köşbasşı» bağdarlamasın jüzege asırw mäselesin talqılaw barısında Premer-Mïnïstr Kärim Mäsimov «Arselor Mïttal» kompanïyasınıñ jobasın «30 korportïvtik köşbasşı» bağdarlamasına engizwdi usındı.
«Ağımdağı jılğı şildeniñ basında Memleket basşısınıñ tapsırması boyınşa Ükimette Qarmetkombïnatpen baylanıstı jaña joba qarastırılıp, jobanı odan äri damıtw jayı qozğalğan bolatın. Sol waqıtta men «Arselor Mïttal» kompanïyasımen kelissözder jürgizip, mäseleni şeşw üşin jumıs tobın qurwdı tapsırğan edim. Jalpı, osı bağıttağı nusqawlar berilgen kezeñde, bul joba bağdarlama quramında bolmağan edi. Degenmen de «Arselor Mïttal» kompanïyasınıñ bul jobasın bağdarlamağa, korporatïvtik köşbasşılar quramına engizw kerek dep sanaymın», degen Ükimet basşısı bul iske jawaptı retinde Ïndwstrïya jäne sawda mïnïstrin belgilep, onıñ orındalwın baqılawdı vïce-premer Ömirzaq Şökeevke tapsırdı. «Mäsele köterilgeli beri bir ayğa jwıq waqıt ötti. Men sizderge kelissözder üşin qosımşa eki apta beremin», dedi K. Mäsimov.

Qızılorda oblısı jazğı mawsımda egis alqaptarın swaratın swdan tapşılıq körmes üşin Ükimet «Köksaray» sw rettegişiniñ qurılısın meylinşe jıldam bitirwge tırısatın boladı. Bul twralı bügin Ükimettegi selektorlıq keñeste premer-mïnïstrdiñ orınbaarı Ömirzaq Şökeev ayttı.
«Qızılorda oblısın jazğı mawsım kezinde swmen qamtamasız etw üşin «Köksaray» sw rettegişine qısta sw jïnap alw üşin biz bul jobanı meylinşe jıldam bitirwge tırısamız», dedi selektorlıq keñeste Ö. Şökeev. Onıñ aytwınşa, Sırdarïyanıñ oñ jağalawında ornalasatın «Köksaray» sw rettegişi jobasına Tötenşe jağdaylar mïnïstrligi jawaptı. «Atalmış joba boyınşa nawrızdıñ 11-de juıs tobı qurılğan bolatın. Qazirgi waqıtta rezervten 2,5 mlrd. teñge qarjı bölindi», dedi vïce-premer.

Onıñ sözine qarağanda, atalmış sw rettegişiniñ qurılısın salwğa büginde 150 adam jäne 105 birlik arnayı texnïka jumıldırılğan. Jumıs qarqındı jürwde. «Äkimdik «Aq dala» öndiristik kooperatïvinen 37 mıñ gektar jerdi alw jönindegi jumıstı jürgizwde. Jobağa kelesi jıldıñ byudjetinen de qarjı qarastırılatın boladı», dedi vïce-premer.

QazAqparat